Президент Шавкат Мирзиёев Термез ауданы «Янгиабад» махалласындағы «Termez National Carpets» ЖШС-ның қызметімен танысты.

Кәсіпорын жылына 2,2 миллион шаршы метр кілем шығаруға қауқарлы. Ол үшін Германия, Бельгия, Түркия елдерінен заманауи қондырғылар әкеліп орнатылған. Соның арқасында 150 жаңа жұмыс орны ашылды.

Өнімнің жартысына жуығын экспортқа шығару жоспарлануда. Шикізаттың 80 пайызы жергіліктендірілген. Кәсіпорын іске қосылған біршама уақытта, Әзірбайжан мен Қырғызстанға 255 мың доллардың кілем және кілем бұйымдары экспорттады. Биыл шетелдік тұтынушыларға 4 миллион доллардың өнімін жеткізу жоспарланған.

Кәсіпорында баламалы энергияны пайдалануға ерекше көңіл бөлінгені маңызды. Қазіргі уақытта сыртқы және ішкі жарықтандыру жүйесінде күн батареялары қолданылуда.

Мемлекет басшысы өндіріс барысымен танысты. Облыста шығарылатын өнеркәсіп өнімдерінің көрмесін аралап көрді.

Осы жерде 6 жаңа өндіріс орнын іске қосу салтанатты шарасы өтті. Термез қаласындағы «Indenim Cluster», Жарқорған ауданындағы «Фабулло строй сервис», Ангор ауданындағы «Ангор Барака», Термез ауданындағы «Termiz agro impeks» кәсіпорындары, Сариосиё ауданындағы құрылыс материалдары шағын индустриялық аймағы және Топалаң су электр станциясының өкілдері бейнебайланыс арқылы кешендердің әлеуеті туралы ақпарат берді.

Терміздегі «Indenim Cluster» жауапкершілігі шектеулі серіктестігі мақта талшығынан дайын киім шығаруға маманданған болып, мұнда 400 жаңа жұмыс орны ашылған.

Жарқорған ауданындағы «Фабулло строй сервис» кәсіпорнында жылына 75 мың текше метр автоклавты газоблок шығару игеріліп, 80 жаңа жұмыс орны ашылды.

Ангор ауданындағы «Ангор Барака» жауапкершілігі шектеулі серіктестігінің сауда кешенінде ұлттық қолөнер орталығы ұйымдастырылған. Онда жылына 125 мыңға жуық дайын тігін бұйымдары, ұлттық киімдердің 50 түрі мен қолөнер бұйымдары шығарылып, мыңға жуық әйелді жұмыспен қамтуда.

Сариосиё ауданындағы шағын индустриялық аймақта заманауи құрылыс материалдары шығарылады.

«Termiz agro impeks» жауапкершілігі шектеулі серіктестігі Термез ауданында 3 мың тонна сыйымдылыққа ие мұздатқыш қоймасы мен заманауи жылыжай салып, 220 адамды жұмыспен қамтамасыз етуде.

Топалаң су электр станциясын жаңғырту жобасы аясында оның жалпы қуаты 175 мегаваттқа дейін ұлғайтылды. Бұл жылына 467 миллион киловатт сағат электр энергиясын өндіруге мүмкіндік береді.

Жалпы осы 6 кәсіпорында 2 мың жаңа жұмыс орны ашылып, олардың қызметі арқасында облыс өндірісіне 370 миллиард сум, оның экспортына 20 миллион доллар қосылатын болады.

Мемлекет басшысы символикалық түймені басып, жаңа кәсіпорындарды іске қосты.