Мамлакатимизнинг миллий ва этноспорт турлари вакиллари жорий йилнинг 8-14 сентябрь кунлари Қозоғистон пойтахти Остона шаҳрида ўтказиладиган «V Бутунжаҳон кўчманчилар ўйинлари»га ҳозирлик кўрмоқда.

Дунёнинг 85 га яқин давлатидан 2 мингдан зиёд спортчи иштирокида 21 та этно спорт турлари бўйича ўтказиладиган ўйинларда Ўзбекистоннинг оловқалб спортчилари Ватанимиз шарафини ҳимоя қилади.  

«V Бутунжаҳон кўчманчилар ўйинлари»га кўрилаётган тайёргарлик масалаларига бағишланган йиғилишда Ўзбекистон Республикаси спорт вазири ўринбосари Ш.Маҳмудов, вазир маслаҳатчиси Ш.Мўминжонов, масъуллар ва федерация вакиллари давлатимиз раҳбарининг «Этноспорт турларини оммалаштириш ва ривожлантириш чора-тадбирлари тўғрисида»ги қарори асосида муайян ишлар амалга оширилаётганини таъкидлаб, муносиб кўрсаткичларга эришиш лозимлигини айтиб ўтди.  

Шунингдек, муҳокамалар давомида мамлакатимизда миллий спорт турлари ва халқ ўйинларини кенг тарғиб қилиш, оммалаштириш ҳамда этноспорт турлари бўйича халқаро алоқаларни мустаҳкамлаш юзасидан амалга оширилаётган ишлар хусусида фикр юритилиб, Остона шаҳрида ўтадиган ўйинларда муносиб натижаларга эришиш борасидаги саъй-ҳаракатлар кўриб чиқилди. Ҳар бир спорт тури, тегишли йўналишлар бўйича масъулларнинг ҳисоботлари тингланди.  

Билдирилган фикр-мулоҳазалар, таклифлар асосида «V Бутунжаҳон кўчманчилар ўйинлари»га пухта тайёргарлик кўриш, энг яхши спортчиларни саралаб олиш ва белгиланган чора-тадбирларни тизимли ташкил этиш бўйича мутасаддиларга аниқ вазифалар юкланди.  

Т.Рўзиев, ЎзА