Dzyudo. Marokashda o‘tkazilgan “Masters” turkumiga kiruvchi xalqaro turnirda hamyurtimiz Sharofiddin Lutfullayev uchinchi o‘rinni egalladi.

Mazkur nufuzli musobaqada sportchilar sovrinli o‘rinlar bilan birga 2016-yili Braziliyada bo‘ladigan XXXI yozgi Olimpiya o‘yinlariga yo‘llanma beruvchi muhim reyting ochkolari uchun ham bellashdi.

Vazni 60 kilogrammgacha bo‘lgan dzyudochilar bellashuvida ishtirok etgan Sh.Lutfullayev armanistonlik Xovxannes Davtyan, gruziyalik Amiran Papinashvilini yengib, yarim finalga chiqdi. Ammo yarim finalda imkoniyatni boy bergan polvonimiz uchinchi o‘rin uchun kechgan bahsda jamoadoshi Diyorbek O‘rozboyevni mag‘lub etib, bronza medalni qo‘lga kiritdi.

* * *

Erkin kurash. Rossiyada 1995-1997-yillarda tug‘ilgan sportchilar o‘rtasida an’anaviy turnir bo‘lib o‘tdi. O‘nga yaqin davlatdan 250 nafardan ziyod sportchi qatnashgan musobaqaning vazni 96 kilogrammgacha bo‘lgan kurashchilar o‘rtasidagi bellashuvlarida hamyurtimiz Hasanboy Rahimov kumush medalni qo‘lga kiritdi.