Англия Премьер-лигасининг 24-тур учрашувларидан ўрин олган "Манчестер Сити" ва "Тоттенхэм" учрашуви 2:2 ҳисобида якунланди. Унда Абдуқодир Ҳусанов асосий таркибда майдонга тушиб, тўлиқ ўйин ўтказди. Унинг майдондаги ҳаракатлари "SofaScore" экспертлари томонидан 6.8, "Footmob" порталида, 7.2, "Flashscore"да эса 6.8 балл этиб баҳоланди.

Маълумот учун, "шаҳарликлар" ушбу дурангдан сўнг очколари сонини 47 тага етказиб,  турнир жадвалининг иккинчи ўринидан жой олди.

***

Ла Лиганинг 22-турида «Реал Мадрид» фойдасига 11 та пенальти белгиланди. Бу Испания чемпионатида шу босқич учун рекорд натижа ҳисобланади. Мадридликлар бугун «Райо Вальекано»ни 2:1 ҳисобида мағлуб этди. Ғалаба голини 100-дақиқада Килиан Мбаппе пенальтидан киритди.

***

"Opta" суперкомпьютери "Арсенал” жамоасининг АПЛда чемпион бўлиш имкониятини 91,01 фоиз деб баҳолади. Аввалги турдан кейин бу кўрсаткич 84,44 фоизни ташкил этган эди.

Эслатиб ўтамиз, Микель Артета жамоаси 24-турдан сўнг 53 очко жамғариб, мусобақа жадвалида биринчи ўринни эгаллаб турибди. "Арсенал" яқин таъқибчиси "Манчестер Сити"дан 6 очко, "Астон Вилла"дан эса 7 очко олдинда бормоқда.

***

Эрон Про лигасининг 19-тури доирасида "Истиқлол" ўз майдонида "Пайкан" жамоасига 0:1 ҳисобида мағлуб бўлди. Ушбу беллашувда мезбонлар сафида ҳамюртимиз Рустам Ашурматов асосий таркибда майдонга тушиб, тўлиқ 90 дақиқа ҳаракат қилди.  

***

Жаҳон футболида энг кўп гол урган Криштиану Роналду “Ан-Наср” клубидаги вазиятдан норози ва ўйинларда иштирок этишдан бош тортмоқда.

Гап шундаки, Роналду Саудия Арабистони Давлат инвестиция жамғармаси (PIF) клубга етарли даражада инвестиция киритилмаётганидан шикоят қилмоқда. Шу боис ҳам у “Ан-Наср”нинг миллий чемпионат доирасида “Ар-Риёд” жамоасига қарши ўтказадиган учрашувида майдонга тушмаслигини билдирган.

***

Франциянинг Лига 1 чемпионатининг 20-турида “ПСЖ” сафарда "Страсбур" жамоасини 2:1 ҳисобида мағлуб этди. Шу тариқа, Луис Энрике шогирдлари очколари сонини 48 тага етказиб, турнир жадвалида пешқадамликни сақлаб қолди.

***

"Реал Мадрид" клуби ярим ҳимоячиси Жуд Беллингем "Райо Вальекано"га қарши ўйинда (2:1) олган жароҳатидан сўнг тиббий кўрикдан ўтди. Унга мутахассислар чап оёқнинг ярим пай мушаги шикастланганини таъкидлади. Шу сабабли, Беллингем тикланиш учун тахминан бир ой майдонга туша олмайди.  

***

Самарқанднинг "Динамо" клуби 1 февралдан бошлаб, Тошкентда ўқув-машғулот йиғинига киришди. Вадим Абрамов мураббийлигидаги жамоамиз 1-6 февраль кунлари Тошкентдаги йиғинда "Машъал" (3 февраль) ва "Орол" (5 февраль) жамоаларига қарши назорат баҳсида майдонга тушади. 6 февраль куни эса Бирлашган Араб Амирликларига жўнаб кетади.

Жавоҳир Тошхўжаев, ЎзА