Мактабларда ўқув йили якунланиб, таътил бошланган. Миллий гвардия Тошкент шаҳар бўйича бошқармаси инспектор-психологлари Мактаб ва мактабгача таълим вазирлиги ҳамда маҳалла еттилиги билан ҳамкорликда ўқувчи ёшларнинг таътил кунларини мақсадли ташкил этиш, уларнинг бўш вақтларини мазмунли ўтказишлари учун манзилли ишларни амалга оширмоқда.

Хусусан, пойтахтимизда жойлашган 341 та мактабда ташкил этилган спорт тўгаракларида нафақат ўқувчилар, балки ушбу ҳудуддаги уюшмаган ёшлар ҳам спорт секцияларга, шунингдек, соғломлаштириш майдончаларига жалб этилмоқда.  

– Бу каби спорт тадбирларини ёшларни кўчаларда содир этиладиган ҳар хил ҳуқуқбузарлик, қонунбузарлик каби жиноятлардан сақлаб қолиш, олдини олиш мақсадида ташкил қиляпмиз, – дейди Миллий гвардия Тошкент шаҳар бўйича бошқарма бошлиғи ўринбосари Мақсуда Хўжаназарова. – Зарур бўлса, психологларимиз уйма-уй юриб, ота-оналар билан суҳбатлашиб, манзилли ўрганиб фарзандларимизни спорт тўгаракларига, соғломлаштириш масканларига жалб қиляпти.  

Спорт майдончалари мураббийлар бошчилигида кун давомида ва тунги 22:00 га қадар ўз фаолиятини давом эттирмоқда.

Жумладан, Сергели тумани Бирдамлик маҳалласида жойлашган 277-сонли Ихтисослаштирилган давлат умумтаълим мактаби ҳам бугунги кунда муассаса ўқувчилари ва маҳалла ёшларини ўз бағрига олган.  

Бу ерда спортнинг дзюдо, бадиий гимнастика ҳамда сузиш турлари бўйича устоз-мураббийлар ўз тажрибаларини ёшларга моҳирлик билан ўргатиб келмоқда.  

<iframe width="640" height="420" src="https://www.youtube.com/embed/Zi6ql-wqpj4" title="Sport maydonchalari bolalar bilan gavjum" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Футбол майдонлари бўлса, ҳар доимгидек ушбу спорт турининг ихлосмандлари билан гавжум. Бу эса нафақат ўқувчи ёшларга, уларнинг ота-оналарига ҳам манзур бўлмоқда.  

Н.Раҳмонова, ЎзА