Самарқандда енгил атлетика бўйича Марказий Осиё очиқ чемпионати бўлиб ўтади. Жорий йилнинг 23-25 сентябрь кунлари Самарқанд шаҳрида ўтадиган мазкур нуфузли мусобақада иштирок этиш учун юртимизга 11 та мамлакатнинг 300 нафардан зиёд спортчилари ҳамда 100 нафарга яқин мураббий-мутахассислар, хорижий экспертлар келиши кутилмоқда.

Ўзбекистон енгил атлетика федерациясидан маълум қилишларича, Самарқанд шаҳридаги югуриш йўлакчасининг янги қопламаси ва World athletics стандартларига мос равишда сертификатланган “Афросиёб Арена” спорт мажмуаси Марказий Осиё очиқ чемпионатини ўтказиш учун тайёрлаб қўйилди. 

Айтиш лозимки, Самарқандда амалга оширилган улкан бунёдкорлик ва янгиланишлар теграсида чемпионат ўтадиган стадион ҳам қайта таъмирдан чиқарилди. Жиҳоз ва инвентарлар янгиланди. Шу маънода, ушбу турнир янгича кўринишга келган стадиондаги илк мусобақа ҳисобланади.  

Очиқ чемпионат дастурига биноан спортчилар асосий югуриш йўналишларида ҳам, техник мусобақаларда ҳам белгиланган масофаларга югуриш, баландликка сакраш, таяниб сакраш, узунликка, уч ҳатлаб сакраш, диск отиш, найза улоқтириш бўйича қатнашади. 

Енгил атлетика бўйича Ўзбекистон терма жамоаси аъзолари деярли барча йўналишларда юртимиз шарафини ҳимоя қилади. 

Эътиборлиси, баҳсларда V Ислом бирдамлиги ўйинлари ғолиблари Шарифа Давронова, Анвар Анваров, Сухроб Хўжаев, Фарида Солиева, Наргиза Қўчқорова, Роксана Худоёрова каби истеъдодли спортчиларимизнинг ғолиблик учун кураш олиб боришда иштирок этиши мусобақа нуфузини ошириш билан унинг муросасизлигини таъминлаши шубҳасиз. 

Очиқ биринчилик доирасида шунингдек, “Save Aral – 2022” халқаро хайрия оммавий югуриш мусобақасининг навбатдаги босқичи ўтиши, уларда икки мингдан ортиқ иштирокчи қатнашиши Марказий Осиё очиқ чемпионатининг қамрови кенглигидан далолатдир. Қолаверса, “Save Aral” баҳслари орқали Орол денгизи атрофидаги экологик муаммога жамоатчилик эътиборини қаратиш назарда тутилган. 
 

Т.Рўзиев,  
ЎзА