Бугун, 18 апрель куни Доҳада спорт гимнастикаси бўйича давом этаётган жаҳон кубогининг 4-босқичида мамлакатимиз спортчиларидан Оксана Чусовитина эркин машқ, тўсин баҳсларида, Расулжон Абдураҳимов параллель брус мусобақаларида ўз омадларини синаб кўради.

Кеча нуфузли мусобақанинг илк кунги беллашувларида иштирок этган Оксана Чусовитина таяниб сакраш дастурида 13.049 балл билан тўртинчи натижани қайд этиб, финал йўлланмасини қўлга киритди.

Ўзбекистон терма жамоасининг умидли спортчиси Абдулазиз Мирвалиев эса эркин машқ дастурида 13.800 балл жамғарди ва финалда медаллар учун курашиш имконига эга бўлди. Эслатиб ўтамиз, 39 та мамлакат вакиллари иштирок этаётган жаҳон кубогининг 4-босқич баҳслари 21 апрелга қадар давом этади.

Т. Рўзиев, ЎзА