Ҳафта давомида спорт оламидаги энг муҳим воқелик ва янгиликлардан хабардор бўлинг

Якунланган ҳафта спорт оламида бир қатор янгилик ва воқеалар содир бўлди. Хусусан, футбол бўйича Ўзбекистон чемпионати — Суперлиганинг 16-тур учрашувлари якунланди.

Ўзбекистонлик легионер футболчилар Элдор Шомуродов ҳамда Ҳусниддин Алиқулов янги жамоасида дебют ўйинини ўтказди. Аббосбек Файзуллаев ва Абдуқодир Ҳусанов захирада қолдирилди.

Озарбайжон пойтахти Боку шаҳрида Шахмат бўйича Жаҳон кубоги бошланганини ўтган сафарги кўрсатувизда айтиб ўтгандик. Афсуски дайжестимизнинг ушбу сонигача бу турнирда ўз иштирокини давом эттираётган бирорта юртдошимиз қолмади. Энг узоққа Жавоҳир Синдоров борди ва у ҳам 1/16 финалида ўз иштирокини тўхтатди. 

Дзюдо бўйича Ўзбекистон миллий жамоаси Венгрия мезбонлик қилаётган "Masters" турниридаги иштирокини якунлади. Будапештдаги мусобақаларда Музаффарбек Тўрабоев -100 кг вазн тоифасида ғалаба қозониб, ўзбек дзюдоси учун 12 йил кутилган олтин медални тақдим этди. МОҚ расмий сайтида қайд этилишича, йилда бир марта ўтказиладиган "Masters" мусобақасида сўнгги марта ҳамюртларимиз орасида Ришод Собиров 2011 йил ғалаба қозонган. 

Ўтган ҳафта Беларусда II МДҲ ўйинлари ўз якунига етди. Ўзбекистон спорт делегацияси мусобақа якунига кўра, 28 та олтин, 25 та кумуш ва 53 та бронза, умумий ҳисобда 106 та медаль қўлга киритиб, умумжамоа ҳисобида учинчи ўринни эгаллади. Биринчи ўриндан Россия, иккинчи ўриндан эса мезбон Беларус вакиллари жой олди. Озарбайжон ва Қозоғистон терма жамоалари мос равишда 4 ва 5-ўринга жойлашди.

Дайжестни тўлиқ ЎзАнинг YouTube каналида томоша қилишингиз мумкин.

<iframe width="887" height="499" src="https://www.youtube.com/embed/PjydUhRivPw" title="Спорт дайжест: Дзюдода 12 йил кутилган олтин, МДҲ ўйинларида 106 та медал ва &quot;Навбаҳор-Пахтакор&quot;" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Фаррух Худоёров,

Искандар Исматов (видео), ЎзА