Якунланаётган 2025 йил мамлакатимиз спорт ҳаётида унутилмас воқеаларга бой бўлди. Йил давомида мамлакатимиз спортчилари Олимпия ўйинлари дастурига киритилган спорт турлари бўйича 250 дан ортиқ нуфузли халқаро мусобақаларда муносиб иштирок этди.

Хусусан, жорий йилнинг февраль ойида Хитойнинг Ҳарбин шаҳрида ўтган IX қишки Осиё ўйинларида 26 йиллик танаффусдан кейин ўзбекистонлик спортчилар ўйинларнинг олтин медалига сазовор бўлди.

Фигурали учувчиларимиз Дмитрий Чигирев ва Екатерина Гейниш томонидан жуфтлик баҳсларида қўлга киритилган олтин медаль 30 тадан зиёд мамлакат орасида Ўзбекистон жамоасини "Ҳарбин-2025" қишки ўйинларини кучли бешликда якунлашини таъминлади.

Июль ойида Германиянинг Рейн-Рур провинциясида ўтказилган Бутунжаҳон ёзги Универсиада ўйинларида мамлакатимиз талаба спортчилари 11 та спорт турида иштирок этиб, 4 та олтин, 4 та кумуш, 7 та кумуш медалга эга чиққан ҳолда умумжамоада 13-ўринни эгаллади.

25 сентябрь-9 октябрь кунлари Озарбайжонда ташкил этилган III МДҲ ўйинлари юртимизнинг оловқалб ёш спортчилари учун яна бир тарихий ютуқларга пойдевор бўлди, десак муболаға бўлмайди.

Ўйинлар дастуридан ўрин олган 23 та спорт турида Ватанимиз шарафини ҳимоя қилган 254 нафар спортчиларимиз Россия, Беларусь, Озарбайжон каби мамлакатларнинг Олимпия ўйинлари ва жаҳон чемпионатларида ғолибликка эришган биринчи рақамли спортчилари билан кечган муросасиз беллашувларда умумий ҳисобда 25 та олтин, 33 та кумуш, 61 та бронза, жами 119 та медаллар шодасини қўлга киритди. Мазкур ўйинларда ёшлар таркиби билан иштирок этган боксчиларимизнинг умумжамоада етакчиликка эришгани, дзюдо, қиличбозлик, таэквондо каби йўналишларда кучлилар қаторидан жой олгани ўзбек спортида янги чемпионлар авлоди етишиб келаётганини яққол намоён этди.

Баҳрайнда ўтган III ёшлар Осиё ўйинларида 37 та олтин, 16 та кумуш ва 28 та бронза медаллари билан умумжамоа ҳисобида иккинчи ўрин қўлга киритилиши, VI Ислом бирдамлиги ўйинларида ҳам умумжамоада 2-ўринни, Ар-риёдда жорий йил ноябрь ойининг учинчи ўн кунлигида поёнига етган Ислом бирдалиги ўйинларида Ўзбекистон делегацияси 29 та олтин, 35 та кумуш ва 32 та бронза медали билан умумжамоа ҳисобида иккинчи ўринни эгаллаши 2026 йилни янги муждалар, муваффақиятлар билан қарши олаётганимизни кўрсатмоқда.

Яна бир эътиборли жиҳат, йил давомида юртимиз ёшларининг интеллектуал билимини, тафаккурини дунёга намойиш этган шахматчиларимизнинг жаҳон ва қитъа чемпионатларида, халқаро турнирларда қўлга киритган ўзига хос ғалабалари, чемпионлик шоҳсупасидан жой олгани яқин келажакда жаҳон шахмат тожи янги Ўзбекистон ёшларининг янги ғалабаларига маёқ бўлишига умид уйғотаётгани ҳам бор гап.

Бу, яқинда Ҳиндистонда ўтган жаҳон кубогида ғолибликка эришиш орқали шахмат тожи учун кечадиган 2026 йилги номзодлар турнири йўлланмасини қўлга киритган Жавоҳир Синдоровга насиб этар, балки, халқаро турнирларда дунёнинг энг кучли шахматчиларини саросимага солиб келаётган Нодирбек Абдусатторовга, буни вақт кўрсатади. Муҳими, ўзбек шахмати янги тараққиёт босқичига чиққани натижаларда ўз аксини топмоқда.

Тарихга айланишига қисқа кунлар қолаётган йилнинг янги Ўзбекистон спорт ҳаётидаги яна бир ўзига хос, оламшумул воқеаси бу, сўзсиз футбол бўйича Ўзбекистон миллий терма жамоасининг жаҳон чемпионати йўлланмасини қўлга киритгани бўлди.

Бир сўз билан айтганда, ўтаётган йил давомидаги 500 нафардан ортиқ мамлакатимизнинг оловқалб спортчиларининг халқаро мусобақаларда иштироки учун давлатимиз томонидан зарур шарт-шароитилар яратилди.

Ортда қолаётган 2025 йил давомида оғир атлетика, спорт курашлари, дзюдо, таэквондо WТ, қиличбозлик, гимнастика, сузиш, академик эшкак эшиш йўналишларида миллий терма жамоа аъзолари Олимпия дастурига киритилган спорт турлари бўйича 20 га яқин жаҳон чемпионатида иштирок этди.

Терма жамоамиз вакиллари Осиё ва жаҳон чемпионатларида 550 га яқин медалларни қўлга киритиб, Ўзбекистон спортининг халқаро нуфузини янада юксалтирди.

Хўш, ортда қолаётган йил давомида Ватанимиз спорт шуҳратини халқаро спорт майдонларида улуғлаган спортчиларимизнинг, терма жамоаларнинг қайси бирлари йилнинг энг кучлиси, энг зўри, муносиби бўлишга лойиқ?

Албатта, ҳар бир эришилган ютуқ, муваффақият ортида эътибор, яратилган шарт-шароит, мураббий-мутахассисларнинг, спорт функционерларимизнинг тинимсиз изланиши, алоҳида спортчиларимизнинг машаққатли машғулотлари мужассам.

Шу маънода, жаҳон чемпионатларида, комплекс мусобақаларда, Олимпия ўйинлари тизимидаги халқаро турнирларда олтин медалларни қўлга киритиб, Ватанимизнинг халқаро обрў эътиборини юксалтиришга беназир ҳисса қўшиб келаётган спортчиларимиз, жамоаларимиз йилнинг энг яхшиси бўлишга муносиб, дегимиз келади.

Тўлқин Рўзиев, ЎзА