Аввал хабар берилганидек, "Ўзбекнефтгаз" акциядорлик жамияти бошқаруви раиси Меҳриддин Абдуллаев бошчилигида ишчи гуруҳ жойлардаги ишлаб чиқариш ва қайта ишлаш корхоналари, конлар ва қудуқлардаги ҳозирги аҳволни ўрганмоқда.

Ўрганиш доирасида Муборак нефть ва газ қазиб чиқариш бошқармасининг "Сомонтепа" конида газни дастлабки тайёрлаш қурилмаси ҳам ишга туширилди.

Шу муносабат билан ишчи гуруҳ аъзолари ушбу тадбир очилишида иштирок этди.

Унда бошқарув раиси М.Абдуллаев соҳада қисқа фурсатда бажарилган ишлар республика иқтисодиёт тармоқлари ва аҳолисига ёқилғи-энергетика маҳсулотларини барқарор етказиб бериш, нефть-газ тармоғида ишлаб чиқаришнинг узлуксиз ишлашини, 2020 йилги асосий прогноз кўрсатгичларининг сўзсиз бажарилишини таъминлашга хизмат қилишини таъкидлади.

Айтиш жоизки, мазкур кондаги 2-сонли "Сомонтепа" газни дастлабки тайёрлаш қурилмасидан 1-сонли "Сомонтепа" сиқув компрессор станциясигача узунлиги 33 км. диаметри Ø-1020 мм. газ қувурини монтаж қилиш ишлари бажарилди. Бунда 2-сонли газни дастлабки тайёрлаш қурилмаси қисқа фурсатда ишга туширилди.

Амалга оширилган ушбу қурилиш ишлари натижасида кунлик қўшимча 1 млн. куб. метр табиий газ ва 2 тонна газ конденсати қазиб чиқариб олишга эришилди.

"Ўзбекнефтгаз" АЖ матбуот хизмати маълум қилишича, қурилиш- монтаж ишлари учун зарур ускуналар ушбу акциядорлик жамиятининг нефть ва газ қазиб чиқариш бошқармалари ички имкониятидан фойдаланилган ва қурилиш-монтаж ишлари қисқа муддатда амалга оширилган.