Сомалида 55 нафар йўловчи билан парвоз қилган самолёт техник муаммо сабаб аэропорт яқинидаги океан қирғоғига фавқулодда қўнишга мажбур бўлди, деб хабар бермоқда “ABCNews” нашри.

Таъкидланишича, Могадишодан Галкайо шаҳрига йўл олган “Fokker 50” русумли ҳаво кемаси “StarSky” авиакомпаниясига тегишли бўлган.

Маълум қилинишича, учоқ ҳавога кўтарилгандан кўп ўтмай экипаж техник носозликни аниқлаган ва самолётни орқага — пойтахт аэропортига қайтаришга қарор қилган. Қўниш жараёнида лайнер учиш-қўниш йўлагидан чиқиб кетиб, Ҳинд океани соҳили томон силжиган. Қаттиқ қўниш натижасида самолётнинг қанот қисми шикастланган.

Сомали Фуқаро авиацияси бошқармаси раҳбари Аҳмад Малим Ҳасаннинг билдиришича, ҳодиса оқибатида ҳалок бўлганлар йўқ. Барча йўловчи ва экипаж аъзолари қутқарувчилар томонидан хавфсиз ҳудудга олиб чиқилган. Воқеа юзасидан расмий текширув ишлари олиб борилмоқда.

Фардона Яхшибоева, ЎзА