Пойтахтимизда Бизнес-омбудсман девони, Савдо-саноат палатаси, Солиқ ва Божхона қўмиталари раҳбарияти иштирокида тадбиркорлар билан давлат органлари ўртасидаги солиқ низоларини тезкор ҳал этишга бағишланган тадбир бўлиб ўтди.

Тадбир доирасида Солиққа оид низоларни судгача ҳал этиш учун ташкил этилган эксперт кенгашининг биринчи йиғилиши ўтказилди.

Мазкур кенгаш Президентимизнинг жорий йил 11 июлдаги «Солиққа оид низоларни судгача ҳал қилиш механизмларини такомиллаштириш чора-тадбирлари тўғрисида»ги қарорига мувофиқ ташкил этилган. 2025 йил 24 октябрда қабул қилинган 672-сон Ҳукумат қарори билан унинг фаолиятини тартибга солувчи низом тасдиқланган.

Кун тартибига кўра, Тошкент вилояти Ангрен шаҳридаги “Central Asia Chemicals” МЧЖ фаолиятида юзага келган муаммоли вазият атрофлича кўриб чиқилди. Шунингдек, Эксперт кенгашининг фаолиятини ташкил этиш ва уни юритиш бўйича Регламентни тасдиқлаш масалалари муҳокама қилинди.

Йиғилиш давомида тадбиркорлар билан давлат органлари ўртасидаги солиқ низоларини тезкор, холис ва қонуний тарзда ҳал қилишга хизмат қиладиган аниқ таклиф ва тавсиялар шакллантирилди.

Гулноза Бобоева, ЎзА