Сурхондарё вилояти Сариосиё туманида яшовчи Сожида Раҳимова Истеъмолчилар ҳуқуқларини ҳимоя қилиш жамиятига ариза билан мурожаат қилган.

Мактабда рус тили ўқитувчиси бўлган Сожида Раҳимованинг ёзишича, ўғли Қодиров Шодмоннинг ўқиши учун тўлов шартнома пулини ўз иш ҳақидан ўтказган. Ўтказилган маблағнинг 12 фоизи, яъни 2757348 сўм имтиёз сифатида фуқарога қайтарилиши керак эди, лекин орадан анча вақт ўтса-да, Сариосиё туман давлат солиқ инспекциясининг масъул ходимлари фуқаронинг пулларини қайтармай келган.

Фуқаронинг мурожаати қонунчиликда белгиланган тартибда ўрганилгач, имтиёз сифатида қайтарилиши керак бўлган маблағ фуқаронинг пластик карточкасига ғазначилик бўлими орқали ўтказиб берилди. Кимгадир бу муаммо арзимасдек кўриниши мумкин, лекин таълим беришдек машаққатли меҳнат билан фарзандини ўқитаётган мактаб ўқитувчиси учун бу муаммо қанчалик мушкул эканини англаш қийин эмас...

Мафтуна Каримова, ЎзА