Футбол

Футбол бўйича “Париж – 2024” Ёзги олимпияда ўйинларига бериладиган йўлланма учун Қатар давлатида U – 23 ёшдаги футболчилар ўртасида ўтказилган Осиё кубоги баҳслари муносабати билан Ўзбекистон чемпионати суперлигасида танаффус ниҳоясига етди. Андижон шаҳридаги “Bobur Arena” стадионида мамлакат биринчилигининг 6-туридан ўрин олган “Андижон” ва “Сўғдиёна”жамоалари ўртасидаги ўйин билан чемпионат баҳслари давом эттирилди.  

Ушбу жамоалар Ўзбекистон чемпионати доирасида шу кунгача 46 маротаба майдонга тушган. Учрашувларнинг 17 тасида “Андижон” ғалаба қозонган бўлса, 18 ўйин жиззахликлар устунлигида ўтган. 11 учрашув дуранг натижасида якунланган.  

Ўйин кутилганидек, майдон эгалари ва “Bobur Arena”ни тўлдирган футбол мухлисларининг меҳмон жамоага қарши кучли ҳужумлар босими билан бошланди. Илк бўлимнинг биринчи ярмида андижонликларнинг кетма-кет ҳужумлари, жиззахликларнинг эса ишончли ҳимоя ва кам сонли қарши ҳужумлари билан ўтди. Биринчи бўлимнинг иккинчи ярмида майдонда тенг кураш кетган бўлса, бўлим сўнгида эса меҳмонлар “Андижон” дарвозаси олдида кучли босимни юзага келтирди. Аммо гол киритиш на мезбонларга ва на меҳмонларга насиб этмади.  

Ўйиннинг иккинчи бўлими кутилмаганда жиззахликларнинг ҳужумлари билан бошланди ва бу учрашувнинг 64-дақиқасида ўз самарасини берди. Нодиржон Соибовнинг бошлаб берган комбинациясини легионер Люпчо Дориев кучли зарба билан ниҳоясига етказди – 0:1.  

Ўтказиб юборилган голдан сўнг, майдон эгалари бош мураббийи Александр Хомяков “Андижон” таркибида кетма-кет 5 та ўзгаришни амалга оширди. Аммо “Сўғдиёна”нинг сербиялик посбони Милан Митровичнинг чиройли “сев”лари ва ҳимоячиларнинг ишончли ўйини олдида “Андижон”лик футболчилар гол киритишни уддасидан чиқа олмади.  

Андижон “Бургутлар”и ўз майдонида Жиззахнинг “Сўғдиёна” клубини 8 йил аввал, мағлуб этган экан. Ушбу нохуш анъанага андижонлик футболчилар бу гал ҳам чек қўя олмади. “Андижон” – “Сўғдиёна” якуний ҳисоб 0:1.  

Шу турдан ўрин олган Наманганнинг “Навбаҳор” жамоаси Тошкентнинг “Локомотив” клубига ҳеч қандай имконият қолдирмай, йирик – 4:0 ҳисобида мағлубиятга учратган бўлса, ушбу мавсумда сўнгги поғонада бораётган пойтахтнинг “Бунёдкор” клуби Термизнинг “Сурхон” жамоасига 0:2 ҳисобида бой берди.  

Бугун Навоийнинг “Қизилқум” жамоаси жорий мавсум чемпионликка даъвогарлардан бири деб қаралаётган Фарғонанинг “Нефтчи” клубини қабул қилса, эртага (7 май) Тошкентда Ўзбекистоннинг амалдаги чемпиони “Пахтакор” Бекободнинг “Металлург” жамоаси билан ҳамда Ўзбекистон кубоги баҳсларидан чиқиб кетган икки клуб – Олмалиқнинг ОКМК ҳамда амалдаги мамлакат кубоги соҳиби Қаршининг “Насаф” жамоалари ўзаро баҳс олиб боради.  

Мазкур турдан жой олган Самарқанднинг “Динамо” ҳамда Тошкентнинг “Олимпик” жамоалари ўртасидаги баҳс бошқа кунга қолдирилди.  

А.Қаюмов, ЎзА.