Футбол бўйича Ўзбекистон суперлигасида 21-тур учрашувлари кеча Жиззахнинг “Сўғдиёна” ва Олмалиқнинг ОКМК жамоалари ўртасидаги баҳс билан ниҳоясига етди.

Ўйин турнинг марказий учрашуви дея эътироф этилган эди, лекин баҳс кутилганидек шиддат ва жозибани тақдим эта олмади. Ҳар иккала жамоа гол урилгунича рақиблари дарвозаси олдида тез-тез хавфли вазиятларни уюштириб турди. Учрашувнинг 12-дақиқасида  меҳмонларнинг легионер футболчиси Рубен Санчес жамоадоши Хуршид Ғиёсовнинг узатган тўпини унчалик кучли бўлмаган зарба билан дарвоза томон йўллади. Зарба пайтида меҳмонларнинг яна бир легионер футболчиси Клейди Даци жиззахликлар посбонини вазиятдан тўсиб, чалғитишнинг уддасидан чиқди ва Милан Митрович бу зарбани кўрмай қолди, натижада тўп “Сўғдиёна” дарвозаси тўрига бориб тушди – 0:1.  

Ушбу голда мезбон жамоа ҳимоячилари сунъий равишда ўйиндан ташқари ҳолатни юзага келтиришган эди, лекин “Сўғдиёна”нинг яна бир ҳимоячиси Алишер Салимов “ухлаб қолиб” эгаллаган жойида қолиб кетди ва сунъий равишдаги уюштирилган ўйиндан ташқари ҳолат амалга ошмай қоди.  

Ўтказиб юборилган голдан сўнг майдон эгалари футболчилари бирмунча вақт ўзларига кела олмай, анча ўйинлари қовушмай турди. Шу сабабдан ҳам мезбонларнинг ўйинида анча вақтгача хатоликлар ва палапартишликлар кўзга ташланиб турди. Бу эса стадионга йиғилган кўп сонли жиззахлик мухлисларнинг ҳақли норозиликларига сабаб бўлди. 

“Сўғдиёна” футболчилари фақат биринчи бўлимнинг охирларига бориб, бироз ўзларига келди ва бир қатор хавфли ҳужумларни ташкил этди. Олмалиқлик футболчилар эса иккинчи рақам остида тўп суриб, тезкор қарши ҳужумлар уюштириб турди. Фақат мезбонлар дарвозабонининг маҳоратигина яққол голлардан майдон эгаларини сақлаб қолди. Шу тариқа жамоалар 0:1 ҳисобида танаффусга чиқиб кетди.

Иккинчи бўлимда икки жамоа икки хил ўйин намойиш этди. ОКМК бош мураббийи Миржалол Қосимов ушбу турда турнир жадвалида биринчи поғонада бораётган Қаршининг “Насаф” жамоаси Термизнинг “Сурхон”ига қарши ўйинда дуранг (1:1) ўйнаб очко йўқотганидан фойдаланиб, ўз шогирдларига ана шу ҳисобни ушлаб қолиш ва тезкор қарши ҳужумлардан унумли фойдаланишни уқтирганлиги, жиззахликлар бош мураббийи Иван Бошкович эса рақибга бутун майдон бўйлаб кучли босим уюштириб, меҳмонлар дарвозасини ишғол этиш вазифасини қўйганлиги 2-тайм бошиданоқ амалда кўринди.  

Шу ўринда ОКМК жуда ақлли ҳимояланиб, онда-сонда бўлса-да қарши ҳужумларга чиқиб турганини таъкидлаб ўтиш жоиз. Лекин ана шу бўлим давомида тўпга эгалик қилиш бўйича “Сўғдиёна” (68 фоиз), ОКМК(32 фоиз)га нисбатан катта устунликка эришди.  

Майдонга мезбон мураббийлар штаби томонидан бир неча нафар захирадаги футболчилар туширилгандан сўнггина ўртадаги фарқ йўққа чиқди.

Учрашувнинг 87-дақиқасида бурчакдан узатилган тўп кутилмаганда меҳмонлар сардори, тажрибали ҳимоячи Ислом Тўхтахўжаевнинг тиззасига тегиб (автогол) дарвоза тўридан жой олди – 1:1.  

Суперлига 21-туридан ўрин олган “Сўғдиёна” – ОКМК учрашуви 1:1 ҳисобидаги жангавор дуранг билан якунига етди, бу эса “Насаф”нинг фойдасига ишлаб, Қашқадарё вилояти жамоасини чемпионлик сари яна бир қадам яқинлаштирди.  

А.Қаюмов,

ЎзА мухбири