FIFA кунлари муносабати билан давлатлар миллий терма жамоалари жаҳон чемпионатига саралаш ва бошқа турнирларда иштирок этиши туфайли футбол бўйича Ўзбекистон чемпионати суперлигасида айни пайтда кичик танаффус бўлиб турибди.

Ўзбекистон миллий терма жамоаси ҳам жаҳон чемпионати саралаш баҳсларининг 3-раундида бугун бўлиб ўтадиган 3-турда Эрон, 15 октябрь кунга белгиланган 4-турида эса Бирлашган Араб Амирликлари терма жамоаларини қабул қилади.

Суперлигамизда юзага келган танаффусдан унумли фойдаланган мамлакатимиз профессионал футбол клублари бир қатор назорат ўйинларида иштирок этмоқда.  

Куни кеча Жиззахнинг “Сўғдиёна” клуби ўз майдонида Тошкентнинг “Олимпик” жамоаси билан назорат учрашувини ўтказди.  

Ушбу баҳсда Ўзбекистон Олимпия терма жамоаси ва “Олимпик” клуби собиқ бош мураббийи Тимур Копадзе 2-давра бошланиши арафасида жамоани тарк этганидан сўнг, клубдаги бир қатор етакчи футболчилар бошқа клубларга ўтиб кетди. “Олимпик”нинг анча кучсизланиб қолганлиги ушбу ўйинда ҳам яққол сезилди.  

Ўйиннинг 1-дақиқасидаёқ “Олимпик” клуби футболчиси Шукрон Йўлдошев ўз дарвозасини ишғол этиб қўйиб, автогол муаллифи бўлди – 1:0.  

Ўйиннинг 17-дақиқаси “Сўғдиёна”нинг Шимолий македониялик легионер футболчиси ва жамоа тўпурари Люпчо Дориев рақиб дарвозасини ишғол этиб, ҳисобни 2:0 кўринишга олиб келди.  

Учрашувнинг биринчи бўлими тугашига 5 дақиқа қолганида жиззахликларнинг тажрибали ярим ҳимоячиси Станислав Андреев тошкентликлар дарвозасига 3-голни киритиб, фарқни учтага еткади. Жамоалар 3:0 ҳисобида танаффусга чиқди.

Танаффусда бош мураббийдан керакли кўрсатмаларни олган “Олимпик” футболчилари ўйинида сезиларли даражада ўзгариш кўзга ташланиб, жамоа кўпроқ ҳужумга эътибор қаратди ва мезбонлар дарвозаси олдида қатор хавфли вазиятларни ярата бошлади. Икккинчи бўлимда асосан иккинчи рақам бўлиб тўп сурган майдон эгалари эса қарши ҳужумга таяниб тўп сурди.  

Ана шундай тезкор қарши ҳужумлардан бири учрашувнинг 75-дақиқасида ташкил этилиб, “Сўғдиёна”нинг ёш иқтидорларидан бири Умидбек Султоновнинг чиройли голи билан якунига етди – 4:0.

Тўртинчи голдан сўнг “Сўғдиёна” ўйинни бироз бўлса-да бўшаштирди. Меҳмонлар майдон эгаларининг ҳолатидан унумли фойдаланиб, ўйиннинг 90-дақиқасида “Олимпик” футболчиси Акбар Ўктамов рақиб дарвозасига гол киритиб, ҳисобни биттага бўлсада қисқартирди 4:1.

А.Қаюмов,  

ЎзА