Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири ўринбосари Жусипбек Казбеков Марказий Осиё учун Экологик реабилитация ҳисоби (ERH) Ассамблеясининг раиси Адриаан Вандермеер ҳамда Европа тикланиш ва тараққиёт банки вакиллари билан учрашди.

Қайд этилишича, Экология вазирлиги ва ЕТТБ ўртасида “Янгиобод ва Чоркесар-2 уран конлари объектларини рекультивация қилиш” грант битими имзоланган.  

Рекультивация бу – инсон фаолияти натижасида унумдорлиги сезиларли даражада пасайган ерлар ва сув ресурсларини экологик ва иқтисодий жиҳатдан тиклаш бўйича чора-тадбирлар мажмуи.  

Битим лойиҳасида Тошкент вилоятининг Янгиобод шаҳри ва Наманган вилоятининг “Чоркесар”  қишлоғидаги собиқ уран конлари ҳудудини тиклаш ва мелиоратив ҳолатини яхшилаш кўзда тутилган.  

Учрашув давомида томонлар ўртасида собиқ уран конларини рекультивация қилиш билан боғлиқ режалаштирилган ва амалга оширилаётган тадбирлар, ERH Ассамблеясининг 8-йиғилиши мавзулари билан қисқача танишиш, тегишли рухсатномаларни расмийлаштиришда кечикишларга йўл қўймаслик мақсадида лойиҳани амалга оширишда бошқа вазирлик ва идоралар билан мувофиқлаштириш, мониторинг ва техник хизмат кўрсатиш ҳамда бошқа қатор масалалар  муҳокама қилинди.  

Маълумот ўрнида таъкидлаш лозимки, жорий йилнинг 8–9 сентябрь кунлари ERH, Европа комиссияси, Халқаро атом энергияси агентлиги, ЕХҲТ, БМТТД, Қирғиз Республикаси ва Тожикистон Республикаси вакиллари иштирокида ERH Ассамблеясининг 8-йиғилиши ўтказилиши режалаштирилган.  

Шунингдек, Чехия, Эстония, Финляндия, Франция, Венгрия, Латвия, Руминия, Швеция, Швейцария, Нидерландия, Буюк Британия, АҚШ дипломатик ваколатхоналари раҳбарларининг собиқ уран конларини рекультивация қилиш ишлари билан танишиш мақсадида Янгиобод шаҳрига ташрифи кўзда тутилган.  

Муҳайё Тошқораева,  

ЎзА