1994 йил АҚШ собиқ Президенти (1969-1974 йиллар) Ричард Никсон Украинада қуролли тўқнашув юз бериши мумкинлиги ҳақида гапирган экан. Бу ҳақда “The Wall Street Journal” Никсоннинг ўша пайтда (1993-2001 йиллар) давлат раҳбари бўлган Билл Клинтонга юборган махфий мактубига таяниб, маълум қилди.

Газета маълумотига кўра, Никсон ўшанда Россия ва Украинага икки ҳафталик ташриф уюштирган. 21 март куни сафар ҳисоботи ўлароқ, Президентга мактуб ёзган. Мазкур хат мазмунини Клинтоннинг президентлик кутубхонаси ошкор этди.  

Никсон Москва ва Киев ўртасидаги муносабат ёмонлашиши эҳтимолидан хавотир олиб, Украинадаги вазиятни “ўта портловчи”, дея таърифлаган. 

“Вазият назоратдан чиқиб кетса, Босния уруши (1992-1995 йиллар) болалар ўйини каби бўлиб қолади”, дейилган хатда. Шу билан бирга, Никсон америкалик дипломатлар бу масалага етарлича жиддий ёндашмаган, деган фикрни ҳам билдирган.  

“Украина масаласи муҳимлигини ҳисобга олиб, сизларни Киевдаги дипломатик иштирокни зудлик билан кучайтиришга чақираман”, дея Никсон мактубидан иқтибос келтиради “WSJ”.