Буюк Британиянинг собиқ Бош вазири Борис Жонсон бир миллион фунт стерлинг миқдорида пора олгани айтилмоқда. “The Guardian” ёзишича, интернет тармоғида унинг йирик миқдорда пора олганини тасдиқловчи ҳужжатлар пайдо бўлган.

Жонсоннинг қўштирноқ ичидаги “ҳомийси” тадбиркор Кристофер Харборн экан. Доим ўзини панада олиб юришга ҳаракат қилса-да, Британия сиёсий саҳнасида уни сирли ишлар ҳомийси сифатида яхши билишади. Қиролликнинг Европа Иттифоқи таркибидан чиқиши ҳам Харборннинг миллионлари ҳисобидан молиялаштирилгани айтилади.  

Интернет орқали тарқалган ҳужжатга кўра, собиқ Бош вазир лавозимдан кетгач, анча бойиган. У ташкил қилган компания ҳисоб рақамига 2022 йил ноябрида бир миллион фунт ўтказилган. Жонсон ушбу маблағ сиёсий фаолият учун олинганини расман қайд этмагани журналистларда шубҳа уйғотган.  

Мухбирлар қизиқишини янада орттирган жиҳат шуки, Харборн 2022 йил март ойида Жонсон билан бирга Киевга борган. Улар икки кунлик сафар давомида мамлакатнинг юқори даражали расмийлари билан учрашган.  

Мухбирлар Харборн билан муносабати ҳақида сўраганда, собиқ ҳукумат бошлиғи жўяли жавоб айтмаган. Умуман, бу икки шахснинг яқинлиги очиқдан-очиқ сезилиб туради. Жонсоннинг Украинага сафари чоғи олинган суратларда Харборн кўринади. Юқорида тилга олинган пул “олди-бердиси” амалга ошган санада улар бирга Сингапурда бўлгани ҳам аниқланган.  

Қизиғи, мухбирлар суриштирувидан кейин Харборннинг адвокати пул ўтказилганини тан олган ва амалиёт Жонсон Британия сиёсий ҳаётида янада фаол иштирок этиши учун қилинганини айтишган. Ҳужжатлар эса маблағ қонун талабига зид равишда ўтказилганини кўрсатади.  

<iframe width="640" height="420" src="https://www.youtube.com/embed/GfpmYjeDpyc" title="Sobiq Bosh vazir pora olganlikda gumonlanyapti" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев (видео), ЎзА