Өзбекстан Республикасы Әзербайжан мен Армения арасындағы бейбіт келіссөздерде маңызды нәтижеге қол жеткізілгенін жоғары бағалайды. Бұл туралы Сыртқы істер министрлігінің ресми мәлімдемесінде айтылды.

— Кеше ғана Вашингтонда тарихи Бірлескен декларацияның қол қойылуы Әзербайжан Республикасы мен Армения Республикасы басшыларының мықты саяси ерік-жігері мен табандылығының, сондай-ақ Америка Құрама Штаттары Президентінің белсенді бейбітшілікке бағытталған күш-жігерінің нәтижесі деп санаймыз, — делінген құжатта.

Тараптардың қақтығысты реттеуге бағытталған көпжылдық еңбегі жоғары бағаланды. Оңтүстік Кавказда ұзақ мерзімді бейбітшілік пен тұрақтылықтың мүмкіндігінше тезірек орнауы кең аймақтағы барлық халықтардың мүддесіне сай ірі көлік және инфрақұрылымдық жобаларды жүзеге асыруға негіз қалайды деген сенім білдірілді, делінген хабарламада.