Өзбекстан сыртқы істер министрі Бахтиёр Саидов Уганданың Өзбекстандағы алғашқы елшісі Мосес Кавалауко Кизиден сенім грамотасының көшірмесін қабылдап алды.

«Уганданың 2027-2029 жылдардағы Қозғалыстағы болашақ төрағалығымызды қолдауын бағалаймыз. Сыртқы істер министрліктері арасында саяси кеңесулер жолға қойылуы елдеріміздің өзара тиімді әрі келешегі зор ынтымақтастығына мықты негіз қалайды. Кәсіпкерлер арасындағы байланыстарды нығайту, халықаралық ұйымдар аясындағы ынтымақтастық, пайдаланылмаған әлеуетті жүзеге асыру және басқа да мәселелер күн тәртібімізде орын алды», – деп жазды Бахтиёр Саидов телеграмм каналында.

Еске сала кетсек, 18 қаңтарда Кампала қаласында Өзбекстан мен Уганда арасында дипломатиялық қарым-қатынастар орнату туралы бірлескен коммюникеге қол қойылған еді.