Өзбекстан Республикасының Сыртқы істер министрі Абдулазиз Камилов Стокгольмде өткен Еуропадағы қауіпсіздік және ынтымақтастық ұйымы Сыртқы істер министрлері кеңесінің 28-ші отырысына қатысты.

СІМ мәліметінше, Швеция төрағалығымен өткен кездесуде ЕҚЫҰ кеңістігіндегі әскери-саяси, экономикалық-экологиялық және адами ынтымақтастықтың өзекті мәселелері талқыланған.

А.Камилов жиынға қатысушыларды Өзбекстанда жүргізіліп жатқан демократиялық өзгерістер, азаматтардың құқықтары мен бостандықтарын қорғау, заңдылықты қамтамасыз ету бағытында атқарылып жатқан шаралар туралы хабардар етті.

Өзбекстан мен ЕҚЫҰ арасындағы ынтымақтастықтың соңғы жылдары оңды дамып келе жатқаны, оның ішінде қауіпсіздік пен тұрақты дамуды қамтамасыз етуде техникалық көмек көрсету бойынша жобалардың жүзеге асырылып жатқаны атап өтілді. Өзбекстан тарапы әріптестікті жалғастырып, барлық бағыттар бойынша ағымдағы бағдарламалардың ауқымын кеңейтуге дайын екендігі атап өтілді.

Отырыста ЕҚЫҰ серіктес-елі Ауғанстандағы жағдайға ерекше назар аударылды. Өзбекстан Сыртқы істер министрі жиынға қатысушыларды осы елдегі гуманитарлық апаттың алдын алу үшін ауған халқына қажетті көмек көрсету үшін шұғыл шаралар қабылдауға шақырды.