Өзбекстан Республикасы Президенті Шавкат Мирзиёевтің шақыруымен Словакия Республикасының Премьер-Министрі Роберт Фицо 8–10 маусым күндері ресми сапармен Өзбекстанға келеді.

Сапар бағдарламасына сәйкес, Ташкент қаласында жоғары деңгейдегі келіссөздер өткізіліп, Өзбекстан мен Словакия арасындағы жан-жақты ынтымақтастықты дамыту мәселелері қарастырылады.

Басым бағыт ретінде сауда, инвестиция және инновация, ауыл шаруашылығы, өнеркәсіп, энергетика, туризм салаларындағы әріптестікті кеңейтуге ерекше назар аударылады. Сондай-ақ, ұйымдасқан еңбек көші-қоны, мәдени-гуманитарлық және білім беру салаларындағы ынтымақтастық мәселелері де талқыланады. Халықаралық маңызы бар тақырыптар, соның ішінде көпжақты алаңдарда өзара қолдау көрсету жөнінде пікір алмасу жоспарланған.

Көшбасшылар кездесуі қорытындысы бойынша Өзбекстан мен Словакия арасындағы өзара тиімді ынтымақтастықты дамытуға бағытталған құжаттарға қол қойылады деп күтілуде.

Сапар аясында Словакия Премьер-Министрі Роберт Фицо IV Ташкент халықаралық инвестициялық форумына да қатысады.