Өзбекстан Республикасының Сыртқы істер министрі Владимир Норов Өзбекстандағы дипломатиялық миссиясын аяқтап жатқан Словакия Республикасының Төтенше және Өкілетті Елшісі Ян Бориды қабылдады.

СІМ мәліметінше, кездесуде бес жылдан бері Словакияның Ташкенттегі дипломатиялық миссиясын басқарып келе жатқан елшінің екіжақты қарым-қатынастардың дәйекті дамуына қосқан үлесі жоғары бағаланды.

Сұхбат барысында Өзбекстан мен Словакия арасындағы саяси, сауда-экономикалық және мәдени-гуманитарлық салалардағы ынтымақтастықтың өзекті мәселелері бөлекше талқыланды.

«Қазіргі уақытта екі елдің сауда деңгейі, бар экономикалық әлеуеті мен өндірістік ресурстарына сәйкес келмейді. Сондықтан, осы бағыттағы коммуникацияны институционализациялау бойынша ұсыныстар қарастырылды.

Тараптар «Өзбекстан – Словакия – Еуропалық Одақ» және «Вишеград тобы + Орталық Азия» форматтары бойынша ынтымақтастықты кеңейтуге мүдделі екенін атап өтті. Өзбекстан мен Еуропалық Одақ арасындағы кеңейтілген серіктестік пен ынтымақтастық туралы келісімге тез арада қол қою керектігі жарияланды», делінген хабарламада.

Ведомство дерегінше, Өзбекстан Олий Мажлисінің палаталары мен Словакия Ұлттық кеңесі арасындағы қарым-қатынасты нығайту жөнінде пікір алмасылып, Елші өз кезегінде Словакияның Өзбекстандағы дипломатиялық миссиясының басшысы ретіндегі қызметінде көрсетілген барлық көмек үшін ризашылығын білдірген.