Chinese
Chinese
Turkish
Tajik
Kyrgyz
Turkmen
Japanese
Arabic
English
French
Spanish
Русский
German
Ўзбек
Oʻzbek
Қазақ
Slovakiya elchixonasidan xayrli tashabbus
10:20 / 2021-11-26

Slovakiyaning O‘zbekistondagi elchixonasi Oliy va o‘rta maxsus ta’lim vazirligining Termiz tumanidagi Afg‘oniston fuqarolarini o‘qitish ta’lim markazi stomatologiya xonasini zamonaviy tibbiy asbob-uskunalar bilan jihozladi.

Shu munosabat bilan o‘tkazilgan tadbirda Slovakiyaning O‘zbekistondagi Favqulodda va muxtor elchisi Van Bon, Afg‘onistonning Termiz shahridagi bosh konsuli Bismilloh Mangal, Afg‘oniston fuqarolarini o‘qitish ta’lim markazi direktori Oybek Ro‘ziyev keyingi yillarda mamlakatimizda yuz bergan o‘zgarish va yangilanishlar yaqin qo‘shni davlatlar bilan o‘zaro do‘stlik aloqalarini yangi bosqichda rivojlantirishda muhim omil bo‘layotganini ta’kidladi. Yon qo‘shni Afg‘onistonda tinchlikni ta’minlash, barqarorlikni tiklash, iqtisodiyot, ta’lim, fan, madaniyat va boshqa sohalarni rivojlantirishga qaratayotgan e’tibor haqida fikr yuritdi.

Prezidentimizning bevosita g‘oyasi asosida barpo etilgan dunyoda muqobili yo‘q zamonaviy ta’lim muassasasi ham bunga yaqqol misoldir. Barcha zamonaviy sharoitlarga ega o‘quv dargohida Afg‘onistonning iqtisodiy-ijtimoiy va boshqa sohalari uchun oliy ma’lumotli malakali mutaxassislar tayyorlanadi. Termiz tumanida faoliyat yuritayotgan mazkur ta’lim muassasasining ko‘p qavatli salobatli o‘quv binosi, 350 o‘ringa mo‘ljallangan talabalar yotoqxonasi, axborot-resurs markazi, sport zali va sport maydonchalari, oshxona afg‘onistonlik talabalar ixtiyorida. Binoda kimyo va fizika kabi fanlarni chuqur o‘zlashtirish, temir yo‘l transporti tizimini puxta o‘rganish uchun lingafon xonalari, laboratoriyalar tashkil etilgan. Afg‘oniston uchun o‘n beshdan ortiq oliy va yigirmaga yaqin o‘rta maxsus, kasb-hunar ta’lim yo‘nalishi bo‘yicha malakali mutaxassislar tayyorlash o‘quv rejalarining modullashtirilgan shakli ishlab chiqilgan. Maishiy, savdo va boshqa xizmatlar ko‘rsatadigan shoxobchalar, turli to‘garaklar faoliyat yuritadi.

– Talabalarimizning tishlari og‘rib qolgudek bo‘lsa, davolatish uchun Termiz shahriga borishiga to‘g‘ri kelayotgan edi, – deydi Oliy va o‘rta maxsus ta’lim vazirligining Afg‘oniston fuqarolarini o‘qitish ta’lim markazi direktori O.Ro‘ziyev. – Slovakiya elchixonasi tuhfa qilgan 10 ming Yevro miqdoridagi stomatologiya jihozlari endilikda afg‘on talabalarining ta’lim muassasamizning o‘zida bepul davolanishiga xizmat qilibgina qolmay, kelgusida shu mutaxassislik bo‘yicha o‘qiydigan yoshlar uchun laboratoriya vazifasini ham bajaradi. Bundan ikki yil muqaddam Slovakiya elchixonasi bizni qo‘llab-quvvatlab, zamonaviy kichik tipografiya uskunalari sovg‘a qilgan edi. Ayni paytda bu jihozlardan ham unumli foydalanyapmiz.

Tadbir yakunida Slovakiyaning O‘zbekistondagi Favqulodda va muxtor elchisi Van Bonga ta’lim markazining esdalik sovg‘alari topshirildi.

 

Xolmo‘min MAMATRAYIMOV,

O‘zA