Словакия Бош вазири Роберт Фицо Киевни кескин огоҳлантирди: Агар Россия нефтини “Дўстлик” қувури орқали Словакияга етказиш тикланмаса, Братислава Украинага фавқулодда электр таъминотини тўхтатади. Бу ҳақда “Euronews” хабар тарқатган.

Ҳукумат раҳбари ижтимоий тармоқ орқали “Словакия – Украина муносабати бир томонлама фойда келтирадиган ҳолатга тушмаслиги керак” деб ёзган. Унинг айтишича, Киев нефть ўтказилишини таъминлашга ҳаракат қилмаяпти ва бу сиёсий қарор.

Маълум бўлишича, ушбу йўналишда қарийб бир ойдирки, нефть оқими тўхтаган. Украина томони тизим Россия дрони ҳужуми оқибатида шикастланганини билдирган.

Фицо Украина учун режалаштирилган 90 миллиард евролик фавқулодда кредит қўллаб-қувватланмаслигини ҳам қўшимча қилган. Венгрия ҳам мазкур кўмакни маъқулламоқчи эмас. Ушбу давлат ташқи ишлар вазири Петер Сийярто Киев томонини “сиёсий иғво” кўтаришда айблаган. Будапешт ва Братислава РФ нефтига чамбарчас боғланиб қолган.
Айни пайт Словакия Украина учун муҳим электр таъминоти манбаига айланган. Россия ҳужуми мамлакат энергетика инфратузилмасига жиддий зарар етказгач, Братислава Киевга электр токи экспортини кучайтирган эди.

Бундай вазиятда Фицонинг таҳдиди энергетик ва геосиёсий тортишувни янада кучайтириши мумкин. 

Мусулмон Зиё, ЎзА