Сурхондарё вилоятида Тиббиёт ходимлари куни кенг нишонланмоқда.

Шу муносабат билан Сурхондарё вилоят ички ишлар бошқармасида бўлиб ўтган тантанали тадбирда ички ишлар органлари соҳавий хизмат раҳбарлари ва тиббиёт бўлими ходимлари иштирок этди.

Унда Ўзбекистон Республикаси Ички ишлар вазири, генерал-лейтенант П. Бобожоновнинг ички ишлар органларида хизмат қилаётган тиббиёт ходимларига йўллаган байрам табриги ўқиб эшиттирилди.

Тадбирда сўнгги йилларда мамлакатимиз соғлиқни сақлаш тизимида юз бераётган ўзгаришлар аҳоли саломатлигини ишончли муҳофаза қилиб, соғлом турмуш тарзини шакллантиришда муҳим омил бўлаётгани таъкидланди. Тиббиёт ходимлари турли вазиятларда одамлар соғлиги учун курашиб, малакали тиббий хизмат кўрсатаётгани билан ёшу-кексанинг самимий олқишларига сазовар бўлаётгани қайд этилди.

Ўтаётган йил коронавирус пандемияси туфайли бутун дунё аҳли бошига тушган ташвишли кунлар саломатлигимиз посбонларини яна бир бор жиддий синовдан ўтказаётир. Юзага келган мураккаб эпидемиологик вазият айниқса, шифокорлар зиммасига шарафли масъулият юклади. Сайёрамизга чанг солган пандемия шароитида тиббиёт ходимлари ўз соғлиги ва ҳаётини хавф-хатарга қўйиб, кўринмас ёвга қарши курашиш, инфекция тарқалишининг олдини олиш ва юртимизда санитария-эпидемиологик осойишталикни таъминлашга улкан ҳисса қўшмоқда. Вилоят ИИБ ҳузуридаги тиббиёт бўлими ходимлари ҳам бу жараёнда фаол иштирок этиб, ўз бурчларини сидқи-дилдан бажараётир.

Мазкур бўлимда 70 дан ортиқ тажрибали шифокор ва ўрта тиббиёт мутахассислари самарали фаолият юритиб, ички ишлар органлари ходимлари ва уларнинг оила аъзоларига, нафақадаги фахрийларга сифатли хизмат кўрсатаётир. Шунингдек, вилоят прокуратураси, вилоят адлия, божхона бошқармалари ходимлари, Термиз ХАХТ баталъони хизматчилари ҳам уларнинг тиббий хизматидан, эътибор ва ғамхўрликларидан баҳраманд бўлмоқда.

Барча қулайликларга эга бинода жойлашган тиббиёт бўлими замонавий асбоб-усуналар билан жиҳозланган. Лабараторияларда турли таҳлилларни тез, сифатли амалга ошириш учун етарли шароит мавжуд.

Тантанали тадбирда бир гуруҳ жонкуяр тиббиёт ходимларига вилоят ички ишлар бошқармаси бошлиғи, полковник А.Исмоилов Ички ишлар вазирлигининг Фаҳрий ёрлиқ, пул мукофотлари, Соғлиқни сақлаш вазирлигининг “Ўзбекистон Республикаси соғлиқни сақлаш аълочиси” кўкрак нишони ва Фахрий ёрлиқларини топширди. Бир гуруҳ тиббиёт ходимлари вилоят ички ишлар бошқармаси бошлиғининг фахрий ёрлиқ ва қимматбаҳо совғалари, пул мукофотлари билан тақдирланди.