“Сиз доим эъзоз ва эътибордасиз”
Мудофаа вазирлигининг Сурхондарё вилояти Хайробод гарнизонидаги ҳарбий қисм хизматчилари томонидан 9 май – Хотира ва қадрлаш куни ҳамда Ғалабанинг 76 йиллиги муносабати билан Олтинсой туманида ташкил этилган тадбир ана шундай номланди.
Ҳарбий хизматчилар дастлаб туман марказидаги мотамсаро она ҳайкали пойига гулчамбарлар қўйди. Жангларда ҳалок бўлган мард, жасур ўғлонлар хотираси ёдга олинди. Иккинчи жаҳон уруши акс этган саҳна кўринишлари, жанговар кўргазмали чиқишлар намойиш этилди.
Тадбирда тинч, обод мамлакатда биз билан бир сафда яшаётган Иккинчи жаҳон уруши қатнашчилари, ногиронлари ҳамда фронт орти меҳнат фахрийлари улуғланди. Ҳарбий оркестр уруш йилларида янграган куй-қўшиқларни ижро этиб, ёш авлодни Ватанга муҳаббат, юртга садоқат ва аждодлар жасоратига ҳурмат руҳида улғайишга, тинч, фаровон ҳаётнинг қадрига етиб яшашга ундади.
Вилоятдаги ҳарбий қисмлар хизматчилари томонидан бошқа ҳудудларда ҳам шундай тадбирлар ўтказилмоқда.
Холмўмин МАМАТРАЙИМОВ, ЎзА