Маълумки, сиёсий партиялар сайловда иштирок этиши ва депутатликка номзод кўрсатиши учун сайлов кампанияси бошлангани эълон қилинган кундан камида тўрт ой олдин Ўзбекистон Республикаси Адлия вазирлиги томонидан рўйхатга олинган бўлиши керак.

Шунингдек, ўзининг сайловда иштирок этишини қўллаб-қувватловчи камида қирқ минг сайловчининг имзосини тўплаши зарур. 

Сайловчиларнинг имзосини йиғиш сиёсий партиялар учун сайловда иштирок этишнинг энг муҳим талабларидан биридир. Шу йил 31 июлдан 15 августга қадар сайловчилар имзосини тўплаш ишлари амалга оширилди. Имзо йиғиш жараёнида ҳар бир сиёсий партия фаоллик кўрсатди.

16 август куни Тадбиркорлар ва ишбилармонлар ҳаракати – Ўзбекистон Либерал-демократик партияси томонидан сайловда иштирок этишга ижозат бериш бўйича Марказий сайлов комиссиясига “Е-saylov” ахборот тизими орқали мурожаат юборилди ҳамда тўпланган имзо варақалари Марказий сайлов комиссиясига кўриб чиқиш учун топширилди.

<iframe width="650" height="420" src="https://www.youtube.com/embed/EEmmLAaxwlM" title="Siyosiy partiyalar imzo varaqalarini Markaziy saylov komissiyasiga taqdim etmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Шу куни Ўзбекистон «Миллий тикланиш» демократик партияси ҳам Марказий сайлов комиссиясига сайловда иштирок этишга ижозат бериш бўйича мурожаатини “Е-saylov” ахборот тизими орқали юборди. Шундан сўнг белгиланган миқдордаги имзо варақалари Марказий сайлов комиссиясига топширилди.

Шунингдек, Ўзбекистон Экологик партияси томонидан сайловда иштирок этишга ижозат бериш бўйича Марказий сайлов комиссиясига “Е-saylov” ахборот тизими орқали мурожаат юборилди ва тўпланган имзо варақалари Марказий сайлов комиссиясига кўриб чиқиш учун топширилди.

Сиёсий партиялар тақдим этган имзо варақаларининг тўғри тўлдирилгани Марказий сайлов комиссиясининг эксперт гуруҳлари томонидан беш кунлик муддатда текшириб чиқилади.

Муҳтарама Комилова, Аслиддин Алижонов, Анвар Аҳмедов (видео), ЎзА