Президентимизнинг тадбиркорлик соҳасида олиб борилаётган ислоҳотлари натижаси ўлароқ вилоятда бизнесдаги муваффақиятлари ва ижтимоий фаоллиги билан барчага намуна бўлаётган тадбиркорлар сони кун сайин ортмоқда.

Бугунги кунда вилоятда 20 минг 662 та маҳаллий ва 210 та хорижий корхоналар фаолият юритмоқда. Улар томонидан биргина 2022 йилнинг 6 ойида 4314 та иш ўрни яратилган бўлса, улар томонидан амалга оширилган маҳсулот ва хизматлар экспорти 141 миллион АҚШ долларни ташкил этади.

Айни кунга қадар фаол тадбиркорлардан 13 нафари давлат мукофотлари, 4 нафари эса Президентимизнинг ташаккурномалари билан тақдирланган.

Куни кеча давлатимиз раҳбарининг “Фаол тадбиркор” кўкрак нишонини таъсис этиш ҳамда бир гуруҳ тадбиркорларни ушбу кўкрак нишони билан тақдирлаш тўғрисидаги фармойиши имзоланди. Унга мувофиқ 7 нафар сирдарёлик салоҳиятли ва жонкуяр тадбиркорлар тақдирланди.

Вилоят ҳокимлигида ташкил этилган тантанали тадбирда вилоят ҳокими Ғофуржон Мирзаев барча тадбиркорларни касб байрами билан табриклаб, кўкрак нишонларини ўз эгаларига тантанали равишда топширди. Шунингдек, “Энг кўп иш ўрни яратган”, “Энг кўп солиқ тўловчи” ва “Энг кўп хорижий инвестиция олиб кирган” 5 нафар тадбиркорлар вилоят ҳокимининг ташаккурнома ва эсдалик совғалари билан тақдирланди.
 

Ш. Суяров,
Ф.Тошматов,(сурат), ЎзА