Viloyat hokimi, senator Akmaljon Mahmudaliyev kuni kecha Guliston shahri “Yoshlar saroyi”da tadbirkorlar bilan suhbat o‘tkazdi. Unda ishtirok etgan 30 dan ziyod turli soha va tarmoqlarda faoliyat yuritayotgan ishbilarmonlar hamda tadbirkorlik bilan shug‘ullanish istagida bo‘lgan fuqarolarning murojaatlari tinglandi. Murojaatlarning 18 tasi shu yerning o‘zida yechimini topdi. 7 tasiga qonuniy tushuntirish berilgan bo‘lsa, qolgan muddat va qo‘shimcha o‘rganish talab etadigan masalalar nazoratga olindi.
* * *
Toshkent viloyatining Parkent tumanida Xalqaro uzumchilik va vinochilik festivali bo‘lib o‘tdi. Unda Koreya, Singapur, Belarus, Gruziya, Ozarbayjon kabi 30 dan ortiq davlatlarning vinochilik sohasida yirik va yetakchi kompaniyalari, qolaversa, respublikamizning barcha hududlari o‘zlarining uzumchilik va qishloq xo‘jaligi mahsulotlari ko‘rgazmasi bilan ishtirok etdi. Festivalda sirdaryoliklar mirishkorlar yetishtirgan uzum, qishloq xo‘jaligi mahsulotlari va “Sirdaryo vino” AJning vino mahsulotlari namoyish etildi.
Festival yakunida sirdaryoliklar “Urf- odatlar aks etgan eng yaxshi badiiy chiqishlari uchun” nominatsiyasi bo‘yicha g‘olib deb topildi.
* * *
Guliston davlat pedagogika institutining bo‘sh turgan maydonida 20x40 o‘lchamdagi sun’iy qoplamali futbol maydoni qurilib, foydalanishga topshirildi. Maydon jamoatchilik fikri orqali hududlardagi ijtimoiy muammolarni hal qilishga mo‘ljallangan “Tashabbusli byudjet” loyihasida g‘olib deb topildi. Ochilish marosimida GulDPI rahbariyati, talabalar, sport ishqibozlari ishtirok etdi. Mazkur zamonaviy futbol maydoni endilikda talabalarning bo‘sh vaqtini mazmunli o‘tkazishga xizmat qiladi.
* * *
Viloyatda paxta terimi qizg‘in pallaga kirmoqda. Sektor rahbarlarining fermer va terimchilar holidan xabar olib, ularning muammolarini hal etib, ilg‘or terimchilarni rag‘batlantirishi an’anaga aylangan.
Viloyat Ichki ishlar boshqarmasi boshlig‘i, polkovnik Sanjar Jabborov Sirdaryo tumanida bo‘lib, paxta yig‘im terimida qatnashayotgan terimchilar bilan uchrashdi. Viloyat IIB boshlig‘i paxtakorlar bilan suhbatlashib, ilg‘or terimchilarga esdalik sovg‘alari topshirdi.
Sh.Suyarov,
O‘zA muxbiri.