Sirdaryo viloyati hokimi G‘ofirjon Mirzayev O‘zbekiston Yoshlar ishlari agentligi direktori A.Sa’dullayev hamda “Biznes- marafon” loyihasi spikerlarini qabul qildi.

Qabulda viloyatda amalga oshirilayotgan islohotlar, sirdaryolik yoshlarning maqsadli loyihalarini qo‘llab-quvvatlash borasidagi amalga oshirilayotgan ijobiy ishlar, erishilayotgan yutuqlar va mavjud kamchiliklar xususida o‘zaro fikr almashildi.

Ochiq muloqotda Sirdaryo viloyati hokimi G‘ofirjon Mirzayev, “Biznes- marafon” motivatsion treningni muvaffaqiyatli o‘tishida qo‘lidan kelgan barcha sharoitlarni yaratib berishini ta’kidlab, loyihachilar – “Diskos.uz” asoschilari Hasan va Husan Mamasaidovlar, “Book cafe” asoschisi, “SAP Uzbekistan” direktori Laziz Adhamov, “Asaxiy.uz” onlayn do‘kon asoschisi Feruzbek Allayev, Najon ta’lim o‘quv markazi asoschisi Temur Adhamov hamda “Cambridge” o‘quv markazi “Selfmade” loyihasi asoschisi Jahongir Po‘latovning ishlariga omad tiladi.

Sirdaryo viloyat hokimligi “Qabullar uyi”da o‘tgan samimiy suhbatdan so‘ng, poytaxtlik mehmonlar ikki guruhga bo‘linib, “Muvaffaqiyatga erishishning sirlari” mavzusida yoshlar ishtirokida “Biznes-marafon” motivatsion trening darslarini o‘tish uchun belgilangan manzillar sari yo‘l oldi.

A.Qayumov, F.Toshmatov, O‘zA