Сингапурдың «Indorama» компаниясы Қашқадария, Сырдария және Ферғана облыстарында жалпы ауданы 100 мың гектарға жуық аумақта мақта-тоқыма кластерін құруды жоспарлап отыр.

Инвестициялар және сыртқы сауда министрі Сардор Умрзаков 23 ақпанда Сингапурдың «Indorama» компаниясы директоры Пракаш Кежривалмен кездесті. Министрліктің баспасөз қызметі хабарлағандай, кездесу барысында мақта және тоқыма кластерін құру жобасын талқылаған. 

Сонымен қатар, олар Қоқандағы иіру өндірісін іске қосу және Қоқан суперфосфат зауытын жаңғырту жобаларын бірлесіп жүзеге асыру туралы пікір алмасты.

Өзбекстанның тоқыма экспорты жылдан-жылға өсіп келеді. Атап айтқанда, 2020 жылы құны 1,9 млрд доллар болатын тоқыма өнімдері әлемнің 70 еліне экспортталды. 2019 жылмен салыстырғанда, бұл көрсеткіш 295,3 млн долларға артық.