Бугун, 22 декабрь куни Ҳиндистоннинг Мумбай шаҳрида шахмат бўйича 6 та жамоа иштирокида ўтаётган “Global Chess League” халқаро турнирининг ярим финал ва финал ўйинлари олдидан сўнгги мусобақалар бўлиб ўтади.

Унда маҳоратли шахматчимиз Жавоҳир Синдоров дона сураётган “Ganges Grandmasters” жамоаси Ҳикару Накамура бошчилигидаги “American Gambits” жамоасига қарши ҳаракатланади.

Кеча ўтказилган ўйинда Вишванатан Ананд сардорлигидаги “Ganges Grandmasters” шахматчилари Алиреза Фирузжа етакчилигидаги “Triveni Continental Kings” жамоасига 5-14 ҳисобида имкониятни бой бериб қўйди.

Мазкур ўйинда Жавоҳир Видита Сантош Гужратини мағлуб этган бўлса-да, унинг ютуғи жамоасини мағлубиятдан қутқаритб қола олмади.

Бугун ўтказиладиган финал ўйинлари олдидан кечадиган охирги баҳсда Жавоҳир Синдоров Ричард Раппортга рўбарў келади.

Айтиш лозим, ҳозирда “Ganges Grandmasters” жамоаси 12 очко билан қўшимча кўрсаткичларга кўра кучли тўртликдан ўрин олган вазиятда “American Gambits” 9 очко жамғарган ҳолда сўнгги поғонани банд этган.

“Global Chess League” халқаро турнирининг учинчи босқич мусобақаларида энг яхши натижа кўрсатган шахматчилар рейтингида 22 балл жамғарган Алиреза Фирузжа ва Жавоҳир Синдоров карвонбошилик қилмоқда. Улардан кейинги қаторларни эгаллаган “UpGrad Mumba Masters” аъзоси Данешвар Бардия ва “Alpine SG Pipers” аъзоси Нино Бациашвилида 20 балл мавжуд.

Эслатиб ўтамиз, “Global Chess League” халқаро турнирининг учинчи ҳал қилувчи босқичи финал ва 3-ўрин учун кечадиган ўйинлари 23 декабрь куни ташкил этилади.

Т.Рўзиев,

ЎзА