Германиянинг машҳур “Siemens” компанияси Россияни тарк этиши ортидан 600 миллион евро йўқотди, деб ёзган “Deutsche Welle”.

Жамоанинг РФги шўъба корхонаси – “Siemens Mobility” бу ҳолатда жиддий зарар кўргани айтилмоқда. Корхона “Россия темир йўллари” билан ҳамкорликда “Сапсан” ва “Ласточка” поездларига техник хизмат кўрсатиш, таркибни таъмирлаш учун депо тармоғини яратиш билан шуғулланган.

2023 йил ҳисоботида “Siemens AG” концерни РФдаги бизнесини сотиб, ниҳоят, мамлакатдаги фаолиятини тўхтатгани, натижада салмоқли зарар кўргани қайд этилган. Шу сабаб, жамоа Германия ҳукуматидан товон пули талаб қилмоқда.

Эслатиб ўтамиз, декабрь бошида “Siemens Mobility”, “Volkswagen Bank” ва бошқа компаниялар расмийлардан Россия бозоридан чиқиб кетиш билан боғлиқ йўқотишни қоплашни талаб қилган. Корхоналар ўз даъвосини киритилган маблағ Германия давлати кафолати остида йўналтирилгани билан асослаган.

“Siemens” 2022 йил Россия – Украина зиддияти асносида Россия бозоридан чиқишини эълон қилган.