Заңсыз жолмен иеленілген активтерді бөлу туралы келісімге қол қойылды.

Ташкент қаласында Өзбекстан тарапы атынан Әділет министрі Акбар Тошқулов пен Швейцария тарапы атынан Швейцарияның Өзбекстандағы Төтенше және Өкілетті Елшісі Константин Оболенский «Заңсыз жолмен иеленілген активтерді бөлу туралы келісімге» қол қойды.

Келісім аясында шамамен 182 миллион АҚШ доллары көлеміндегі қаражат Өзбекстанға қайтарылады. Аталған қаражат Өзбекстан Республикасының кейбір азаматтары тарапынан заңсыз жолмен иеленіліп, 2012 жылы Швейцарияның Бас прокуратурасы Гүлнара Каримоваға қатысты қозғалған қылмыстық іс аясында толықтай тәркіленген.

Бұл қаражат БҰҰ-ның «Uzbekistan Vision 2030 Fundі» көп серіктестік траст қоры арқылы қайтарылады.

Айта кету керек, 2022 жылғы 16 тамызда Швейцарияның Берн қаласында Өзбекстан Республикасы мен Швейцария Конфедерациясы арасында «Швейцария Конфедерациясы аумағында заңсыз жолмен иеленілген активтерді Өзбекстан Республикасы халқының мүддесіне қайтару әдісі туралы келісімге» қол қойылған болатын.

Бұл келісім заңсыз иеленілген активтерді БҰҰ-ның «Uzbekistan Vision 2030 Fundі» атты көп серіктестік траст қоры арқылы қайтару механизмдері мен негізгі қағидаларын айқындайды.

2022 жылғы тамыз айында қол қойылған алғашқы келісім негізінде шамамен 131 миллион АҚШ доллары Өзбекстанға қайтарылуы қарастырылған. Ал жаңа келісімнің қабылдануымен бірге, Өзбекстан халқының игілігіне қайтарылған қаражаттың жалпы көлемі 313 миллион долларға жетті.

«Uzbekistan Vision 2030 Fundі» арқылы қайтарылған қаражат денсаулық сақтау және білім беру салаларындағы әлеуметтік маңызы бар жобаларды жүзеге асыруға бағытталады.

Қор мен оның жобалары туралы ақпарат өзбек және ағылшын тілдерінде ашық дереккөздерде, сондай-ақ қордың ресми веб-сайтында жарияланған.