Цифрлық технологиялар министрі Шерзод Шерматов Швейцарияның Өзбекстандағы елшісінің орынбасары Андрин Финкпен кездесу өткізді.

Министрлік дерегінше, кездесуде Өзбекстанда IT-білімді дамыту, халықаралық ынтымақтастықты кеңейту және жаңа жобаларды жүзеге асыру мәселелері талқыланды.

Кездесуде Швейцарияның даму және ынтымақтастық агенттігі мен IT-білім беру қауымдастығы арасында «Өзбекстанда IT және цифрлық білім беру ландшафтын инклюзивті өсу үшін мүдделі тараптарды байланыстыру» жобасы аясында келісімшартқа қол қойылды.

Аталған жоба цифрлық білім беру арқылы қоғамда инклюзивті дамуды қамтамасыз ету және экономикалық дамуды жеделдетуді мақсат етеді. Оның шеңберінде жастардың IT сауаттылығын арттыру, біліктілікті арттыру мүмкіндіктерін ұсыну, сондай-ақ шалғай аудандардағы жастар мен әйелдерді жұмыспен қамту жоспарланған.

Жобаның алғашқы кезеңінде халықтың цифрлық дағдыларының жағдайы талданады. Нарық қажеттіліктеріне сәйкес жаңа мамандықтар анықталып, IT-білім беру ресурстарын біріктіретін платформа әзірленеді.

Жобаны жүзеге асыру үшін Швейцарияның даму және ынтымақтастық агенттігі IT-білім беру қауымдастығының коммерциялық емес ұйымына 150 мың доллар көлемінде грант бөлді.

Айта кету керек, Швейцариямен жүргізіліп жатқан бұл ынтымақтастық елдегі цифрлық трансформация үдерісін жеделдетеді. Сонымен қатар, экономикалық мүмкіндіктерді кеңейтіп, Өзбекстанның IT нарығындағы халықаралық бәсекеге қабілеттілігін арттыруға қызмет етеді.