Минтақамизда “Янги Марказий Осиё” руҳи шаклланаётгани кўпчиликка маълум. Хусусан, яқинда пойтахтимизда бўлиб ўтган Марказий Осиё давлатлари раҳбарларининг еттинчи Маслаҳат учрашувида Озарбайжон Республикаси ушбу форматнинг доимий иштирокчисига айланди.

Қолаверса, жорий йилнинг 31 март куни Тожикистоннинг Хўжанд шаҳрида Ўзбекистон, Қирғизистон ва Тожикистон етакчилари ўртасида “Хўжанд декларацияси” имзоланди. Мазкур воқеалар минтақада ўзаро ишонч, яқин қўшничилик ва ҳамкорликни чуқурлаштириш йўлидаги саъй-ҳаракатлар изчил давом этаётганини англатади. 

Қайд этиш керакки, “Янги Марказий Осиё” руҳи – бу фақат сиёсий шиор эмас, балки амалий натижалар билан тасдиқланаётган глобал воқеликдир. Марказий Осиё давлатларининг ўзаро яқинлашуви, ташқи ҳамкорлар билан очиқ ва прагматик мулоқоти, шунингдек, ички барқарорликка таянган ҳолда ривожланишга интилиши минтақани халқаро майдонда ишончли ва нуфузли макон сифатида намоён қилмоқда. 

ЎзА мухбири “Дунёга назар” таҳлилий дастури орқали сиёсатшунос Шуҳрат Расулнинг Марказий Осиё интеграцияси ва минтақавий ҳамкорликнинг истиқболлари хусусидаги фикри билан қизиқди.

– Айтиш жоизки, минтақамизда янги геосиёсий парадигма пайдо бўляпти, йирик трансформация жараёнлари юз бермоқда ва бунинг аҳамиятини бугунги кунда дунёдаги етакчи аналитиклар, экспертлар эътироф этмоқда. Мана яқинда Тошкентда ўтказилган Марказий Осиё давлатлари раҳбарларининг Маслаҳат кенгашида Озарбайжон ўлкаси ушбу форматга тўлақонли аъзо сифатида қўшилди ва бундан нафақат минтақа мамлакатлари, балки Озарбайжоннинг ўзи ҳам ютди, деб ўйлайман. 

Энг муҳими, мазкур янги формат истиқболда минтақавий барқарорликни мустаҳкамлаш, иқтисодий интеграцияни чуқурлаштириш, транспорт-логистика йўлакларини ривожлантириш ва умумий хавф-хатарларга биргаликда жавоб қайтариш йўлида янада самарали майдонга айланиши шубҳасиз.

Кўрсатувнинг тўлиқ шаклини ЎзАнинг “YouTube” каналида кўришингиз мумкин.

<iframe width="560" height="315" src="https://www.youtube.com/embed/mK6PLbfpbRc?si=I8QstJT6UCg0leC5" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ў.Алимов, И.Исматов (видеомуҳандис),

ЎзА