Германияның Штутгарт қаласында өткен беделді WTA санатындағы «Porsche Tennis Grand Prix» турнирі өз мәресіне жетті.

Финалда әлемнің бірінші ракеткасы, беларусьтық Арина Соболенко күтпеген жерден латвиялық Елена Остапенкоға 4:6, 1:6 есебінде есе жіберді.

Бұл Остапенко мен Соболенко арасындағы жеке кездесулердегі алғашқы жеңісі болды. Бұған дейінгі 3 ойында Елена қарсыласына жол берген болатын. Бұл жолы латвиялық теннисші атақты қарсыласын аса қиналмай жеңді.

Бәсеке небәрі 1 сағат 6 минутқа созылды. Бұл жеңіс Остапенко үшін маусымдағы алғашқы, ал жалпы мансабындағы тоғызыншы WTA титулы болды. Елена чемпиондық үшін 500 рейтинг ұпайы, 142 610 еуро жүлде қоры және соңғы үлгідегі Porsche автокөлігіне ие болды.

Ал Соболенко финалист ретінде 325 ұпай және 87 825 еуро ақшалай сыйлықты місе тұтпақ.