Poytaxtimiz Toshkentda taniqli grossmeyster, ko‘plab xalqaro turnirlarda vatanimiz sharafini himoya qilishda g‘olib va sovrindorlikka erishgan Shuxrat Safin xotirasiga bag‘ishlab o‘tkazilayotgan “Sh.Safin memorial 2025” xalqaro turnirda mamlakatimizning 5 nafar shaxmatchisi qatorida 5 ta xorijiy davlatning mahoratli “aql gimnastikasi” sohiblari ishtirok etmoqda.

Ortda qolgan 3 ta tur o‘yinlaridan keyin qirg‘izistonlik Semetey Tologontegin 2,5 ochko bilan yakka peshqadamga aylanib oldi.

Kecha tashkil etilgan 3-tur o‘yinlarida mamlakatimiz vakillaridan Miraziz Matyoqubov, Javohir Botirov, Biloliddin Obidov, Shahzod Islomov durang natija qayd etgan bo‘lsa, Akbarali Abduhakimov g‘alabaga erishdi.

Bugun, 17 avgust kuni musobaqaning 4-turida Akbarali Abduhakimov qora donalarda turnirda yetakchilik qilayotgan qirg‘izistonlik Semetey Tologonteginga qarshi bahs olib boradi.

Musobaqalar 20 avgustga qadar davom etadi.

T. Ro‘ziyev, O‘zA