Пойтахтимизнинг Шота Руставели кўчасида 7 октябрдан янги лойиҳа – марказий автобус йўлаги (BRT йўлаги) фаолияти йўлга қўйилди.

Жамоат транспортига устуворлик бериш, тирбандликларни камайтириш ва йўловчилар учун қулай ҳамда хавфсиз шароит яратиш мақсадида ишга туширилган лойиҳанинг мазкур биринчи босқичида 37-, 57- ва 58-сонли автобуслар йўлнинг ўрта қисмида жойлашган махсус ажратилган йўлак орқали ҳаракатланмоқда. Яъни автобуслар йўлнинг ўрта қисмидаги махсус йўлак орқали ҳаракатланиши белгиланган. Йўловчилар эса автобусга чиқиш ва тушишда йўл ўртасида қурилган махсус платформалардаги бекатлардан фойдаланади. Платформага фақат белгиланган пиёдалар ўтиш жойлари орқалигина ўтиш мумкин. 

[gallery-25686]

Таъкидлаш керак, кўчанинг ўрта қисмидаги йўлак фақат автобуслар учун мўлжалланган бўлиб, бошқа транспорт воситалари мазкур йўлакда ҳаракатланиши, тўхташи ёки йўлни кесиб ўтиш қатъиян ман этилади. Зарур ҳолларда эса фақат белгиланган чорраҳалар орқали ҳаракатланиш мумкин. Икки йўналишда ҳам чапга бурилиш ва ортга қайрилиш мумкин эмас. Автобус йўлагига яқин кесишмаларда ҳайдовчилар автобусларга устуворлик бериши шарт. 

Рустам НАЗАРМАТОВ (сурат), ЎзА