“Биз ҳамиша уруш фахрийларидан қарздормиз!” шиори остида ўтказилган онлайн лойиҳа доирасида келиб тушган энг яхши ижод маҳсуллари Бадиий академия сайти ва ижтимоий тармоқлардаги саҳифаларида эълон қилинмоқда.

Ижодий ишларни бефарқ, бепарво томоша қилиш мумкин эмас. Улар тинч ва осойишта кунларнинг қадрига етишга чорлаши билан аҳамиятлидир.

Жумладан, Сурхондарё ихтисослаштирилган санъат мактаб-интернатининг ўқувчиси Шаҳзода Жумаева тайёрлаган лавҳа Ғалабага халқимизнинг қўшган ҳиссасига оид ёрқин тасвирларга бой. Хоразм ихтисослаштирилган санъат мактаб-интернати ўқувчиси Гуласал Аллаберганова урушда қатнашган катта бобосининг расмини тутганича шеър ўқимоқда. Камолиддин Беҳзод номидаги Миллий рассомлик ва дизайн институти талабалари Алина Стилиду ва Ғиёсжон Низомовнинг биргаликдаги ижодий иши урушнинг нақадар оғир ва аянчли оқибатларидан сўзлайди.

Бу каби ижодий лойиҳалар ёшларнинг ҳаётий позицияси, ватанпарварлиги, масъулияти, бурчини теран англашини ҳам намойиш этади.