Андижонда “Шолини кўчат экиш машинасида экиш ва етиштириш” мавзусида дала семинари бўлиб ўтди.

Ўзбекистон Республикаси қишлоқ хўжалиги вазирлиги, Қишлоқ хўжалигида билим ва инновациялар миллий маркази, Жанубий Кореянинг аграр соҳада иш олиб борувчи KOPIA ташкилоти Ўзбекистондаги маркази, Шоличилик илмий-тадқиқот институти, Андижон қишлоқ хўжалиги ва агротехнологиялар институти ҳамкорлигида ташкил этилган дала семинарида олимлар, тадқиқотчилар, шоличиликка ихтосослашган фермер хўжаликлари раҳбарлари иштирок этди.

Семинарда кейинги йилларда мамлакатимизда қишлоқ хўжалиги маҳсулотларини етиштириш, экспорт ҳажмини ошириш, соҳага илғор ва замонавий технологияларни татбиқ этиш ҳамда сув ресурсларидан оқилона фойдаланиш масалаларига алоҳида эътибор қаратилаётганлиги таъкидланди.

Дала семинарида мутахассислар томонидан замонавий ва қатор қулайликларга эга, шоли кўчатини экишга мўлжалланган янги механизациянинг ишлаш жараёни хусусида маълумот берилди.

Семинар давомида KOPIA ташкилотининг Ўзбекистондаги маркази директори Ох Сунг Жонг, шунингдек, Жанубий Корея ва Ўзбекистоннинг шоличилик йўналишида иш олиб бораётган олимлари янги технологияни амалиётда қўллаш ва мазкур йўналишдаги ишларни янада юқори босқичга кўтариш юзасидан ўзаро фикр алмашди.

Мамлакатимиз иқлим шароитида етиштириладиган шоли навларини ҳосилдорлик сифат кўрсатгичлари, экспортбоп маҳсулот етиштиришда эътибор қаратилиши зарур бўлган жиҳатлар олимлар томонидан илмий асослаб берилди. Андижон қишлоқ хўжалиги ва агротехнологиялар институтида шоличилик бўйича олиб борилаётган илмий тадқиқотларнинг натижалари билан танишилди. Олиб борилаётган тадқиқотлар юзасидан таклиф, фикр ва мулоҳазалар билдирилди. Шундан сўнг янги механизациянинг ишлаш жараёни дала тажрибаси орқали амалда қўлланилди.

Мутахассисларнинг таъкидлашича, кўчат экиш машинаси ёрдамида 1 соатда 100 киши кўчат экиши мумкин бўлган майдонга кўчат экилади. Экиш жараёнида 3 нафар ишчи иштирок этади холос. Экилган ҳар бир кўчатнинг оралиғи бир хил - 12 сантиметрдан бўлиб, бир вақтнинг ўзида 6 қаторга кўчат экиш имконига эга. Иштирокчилар замонавий техниканинг қулайлик ва кенг имкониятлари билан танишди. Кўчат экиш ускунаси, умуман, шоличилик борасидаги хорижий тажрибалар ҳақида кенг маълумотлар олди.  

Куннинг иккинчи ярмида иштирокчилар Президентимизнинг 2021 йил 2 февралдаги “Шоли етиштиришни янада ривожлантириш чора-тадбирлари тўғрисида”ги қарорида белгиланган вазифалар ижросини таъминлаш борасида олиб борилаётган ишлар, мазкур йўналишда янги-янги лойиҳаларни амалиётга татбиқ этиш юзасидан ўзаро фикр алмашди.

Мамлакатимизда шоличиликни ривожлантиришда Ўзбекистон ва Корея олимларининг илмий асосланган тажрибалари асосида иш олиб бориш юқори натижаларга эришиш имконини бериши алоҳида қайд этилди.

Ф. УБАЙДУЛЛАЕВ,
З. УМРЗОҚОВ (сурат),
ЎзА