Агар Россия Украинага бостириб кирса Германия ва унинг иттифоқчилари барча зарур чораларни кўради. Бу ҳақда ГФР канцлери Олаф Шольц The Washington Post газетасининг кечки сонига интервью берганда таъкидлади.

"Биз иттифоқчиларимиз билан биргаликда барча зарур чораларни кўришга тайёрмиз. Бизнинг АҚШ ҳукумати билан Европанинг энергетика мустақиллигини таъминлаш учун ҳамда газ транзити бўйича аниқ келишувимиз бор. Биз шунингдек, Украинани қўллаб-қувватлашга ҳам келишиб олдик. Бундан ташқари, Украинадан транзит қилинаётган газ хавф остида қоладиган бўлса кескин чораларни кўрамиз. Шу нарса мутлақо тушунарли бўлиши керакки, бундай вазиятда барча вариантлар кўриб чиқилади. Мен ушбу келишувларнинг тафсилотларига тўхталмайман, бироқ бизнинг жавобимиз биргаликда ва қатъиятли бўлади", - деди у.

Шольцнинг таъкидлашича, Россиянинг ҳарбий аралашуви ундан "жуда катта тўлов талаб қилади". "Бошқа томондан, биз музокараларнинг барча йўлакларидан фойдаланиш учун тинмай ҳаракат қилмоқдамиз. Масалан, АҚШ ва Россия музокаралари, Россия-НАТО, ЕХҲТ ва табиийки “Нормандия форматида" музокаралар олиб борилмоқда", - деди ГФР канцлери.

Мазкур интервью Шольцнинг АҚШга сафари олдидан эълон қилинди. Хабарларга қараганда, у 7 февралда Вашингтонда АҚШ президенти Жо Байден билан учрашади.