Франция мамлакати мезбонлик қилаётган Паралимпия ўйинларининг бугунги кунида пара енгил атлетика ва пара сузиш баҳсларида вакилларимиз иштирок этмоқда.

“Париж-2024” мусобақаларининг S13 классида 200 метр масофага комплекс усулда сузиш баҳсларида Шоҳсанам Тошпўлатова финал босқичига йўл олди.

Пара сузувчимиз мазкур мусобақанинг саралаш босқичида маррага 2 дақиқа 31 сонияда етиб келди.

Энди Шоҳсанам сузиш беллашувларининг кечки дастурида мамлакатимиз вақти билан соат 23:04да Паралимпия медаллари учун кураш олиб боради.  

Ушбу йўналишдаги эркаклар баҳсида эса афсуски Фирдавсбек Мусабеков, Музаффар Турсунхўжаев ва Дмитрий Хорлин каби пара сузувчиларимиз саралаш босқичидан ўта олмади.

Пара енгил атлетика бўйича аёллар ўртасида найза улоқтириш (F56) беллашувларида ҳамюртимиз Наталья Семёнова финал босқичида 16.96 метр натижа кўрсатиб, мусобақани 9-ўринда якунлади.

Эркаклар ўртасида Т36 классида 400 метр масофага югуриш баҳсларида эса яна бир пара атлетимиз Иззат Турғунов 1 дақиқа 04.31 сония натижа қайд этиб, 7-ўринни эгаллади.

Эслатиб ўтамиз, айни вақтда мамлакатимиз паралимпиячилари 6 та олтин, 4 та кумуш ва 4 та бронза медалига сазовор бўлиб, умумжамоа ҳисобида 9-ўринда бормоқда.

Жавоҳир Тошхўжаев, ЎзА