Ижтимоий тармоқларда Бухоро вилояти Шофиркон тумани Туғуруқхонасида болани олиб чиқиш учун пул талаб қилингани ва отахоннинг тиббиёт ходимлари билан жанжали акс этган видеолар тарқалди.

Видеода отахоннинг шифокорларга бақириб, уларни порахўрликда айблагани, эшик ойнасини синдиргани, бир аёлнинг йиқилиб ётгани ҳолати акс этган. 

Воқеага кўра, видеода отахоннинг айтишича, туғуруқхонадан болани олиб чиқиш учун шифокорлардан бири пул талаб қилган. Сўралган пулни туққан аёлнинг яқинлари бермаса, уни уйига рухсат бермасликларини билдиришган. 

Туғилган чақалоқнинг бобоси тиббиёт ходимлари билан тортишувга борган. 

Шу куниёқ туман ҳокимлиги томонидан берилган расмий хабарда эса ҳолат бошқача акс этади. Яъни маълум бўлишича, Шофиркон тумани, Жўйрабод маҳалла фуқаролар йиғинида яшовчи аёл 6 октябрь куни Шофиркон тумани Марказий шифохонасининг Туғуруқ бўлимига физиологик туғуруқ мутахассислар томонидан қабул қилинган. Аёлнинг қайнотаси келинини уйига олиб кетишини сўраб, 9 октябрь куни мурожаат қилган. Бироқ, мутахассислар томонидан келиннинг ҳолатидан келиб чиқиб, 10 октябрь санасида уйига кетишга рухсат берилиши маълум қилинган. Шунга қарамасдан, қайнота томонидан кескин норозилик билдирилган. 

Кенг муҳокамаларга сабаб бўлаётган лавҳада аёлнинг ерда ётганлиги келтирилган. Мазкур аёл келиннинг қайнонаси. Туғуруқ бўлимининг ичкари ҳолатидан олинган лавҳада аёл ерга йиқилганлиги кўриниб турибди. 

Айни дамда фуқаро томонидан келтирилган важ, яъни тиббиёт ходимларининг “коррупция ҳолатлари қайд этилган” сўзлари ҳуқуқ-тартибот идоралари томонидан назоратга олинган ва ўрганиш ишлари олиб борилмоқда. 

Ўрганиш натижалари бўйича маълумотлар бериб борилади. ЎзАни кузатиб боринг. 

Зариф Комилов, ЎзА мухбири