Shmigal: Ukrainaga 2023 yilda 55 milliard dollardan ko‘proq mablag‘ zarur bo‘ladi
Bunga rekonstruksiya bo‘yicha loyihalar uchun 17 milliard dollar ham kiradi, dedi Ukraina bosh vaziri Denis Shmigal Jahon banki va Xalqaro valyuta jamg‘armasi tashkil qilgan konferensiyada onlayn-chiqish qilib.
"Ukraina kelgusida ham jiddiy moliyaviy yordamga muhtoj bo‘ladi. Biz 2023 yilda 55 milliard AQSH dollaridan ko‘proq mablag‘ haqida gapirmoqdamiz", – dedi u.
Shmigalning aniqlik kiritishicha, ko‘rsatilgan summaga byudjet tanqisligini yopish uchun oyiga 3,5 milliard dollar, shuningdek, “rekonstruksiya bo‘yicha tezkor loyihalar” uchun 17 milliard dollar ham kiradi.
Avvalroq Vladimir Zelenskiy ham konferensiyada onlayn-chiqish qilib, kelasi yilda mamlakatning byudjet tanqisligini yopish uchun 38 milliard dollar zarur bo‘lishini ma’lum qilgan edi.
Xalqaro valyuta jamg‘armasi rahbari Kristalina Georgiyeva ham 2023 yilda Ukrainani tashqi moliyalashtirish uchun har oyda 3-4 milliard dollar kerak bo‘lishini aytgan edi.