Navro‘z shukuhi hukmron ayni kunlarda yurtimizning turli go‘shalarida shukrona dasturxonlari yozilib, yurtdoshlarimizga quvonch ulashilmoqda, mehr-oqibat, samimiyat va birdamlik tuyg‘ulari takror-takror qadr topmoqda.

Ana shunday tadbirlardan yana biri Buxoro shahridagi “Shirbudin” mahalla fuqarolar yig‘inida tashkil etildi. Navro‘z dasturxoni atrofida viloyat va shahar hokimligi mutasaddilari, mehnat faxriylari, mahalla ahli jam bo‘ldi. 

Tadbir bahonasida asrlar davomida Navro‘z sayli keng tantana qilingan Shirbudinda yana shodiyona kayfiyat hukmron bo‘ldi. Ajdodlarimizning insoniy fazilatlari, bunyodkorlik tashabbuslari yodga olindi. 

[gallery-6343]

Shodiyona davomida tadbir ishtirokchilariga buxorocha sofi osh hamda Navro‘z ne’matlari ulashildi, yakka yolg‘iz hamda ijtimoiy himoyaga muhtoj yurtdoshlarimiz holidan xabar olindi. 

O‘zbekiston davlat filarmoniyasi viloyat hududiy bo‘linmasi huzuridagi “Buxorcha” ansambli, “Shiru shakar” hamda “Sitorai Mohi-xosa” xalq badiiy jamoalarining chiqishlari barchaga bayramona kayfiyat bag‘ishladi. 

Tohir ISTATOV, O‘zA fotomuxbiri