Шимолий Македония полицияси Скопеда мигрантлар контрабандаси билан шуғулланаётган уюшган жиноий гуруҳни қўлга олганини айтмоқда.

Хабар берилишича, жиноий гуруҳ ўзларини «альпинистлар» деб таништириб, Греция орқали Яқин Шарқдан қочқинларни олиб ўтмоқчи бўлган.

Скопенинг ўн бир жойида, шунингдек Велес, Штип, Струмитса ва Валандово шаҳарларида тинтув ўтказилган. Шундан сўнг, 26 ёшдан 56 ёшгача бўлган олти нафар фуқаро ҳибсга олинган.

Мамлакат полицияси текширувлар чоғида пул, мобил телефонлар, СИМ-карталар, ярим килограмм гиёҳванд модда ва бошқа шу каби ноқонуний ашёларни мусодара қилган.

Ноқонуний муҳожирлар мамлакатга Греция чегараларидан олиб ўтилаётгани маълум бўлди.