Shimoliy Makedoniya politsiyasi Skopeda migrantlar kontrabandasi bilan shug‘ullanayotgan uyushgan jinoiy guruhni qo‘lga olganini aytmoqda.

Xabar berilishicha, jinoiy guruh o‘zlarini «alpinistlar» deb tanishtirib, Gretsiya orqali Yaqin Sharqdan qochqinlarni olib o‘tmoqchi bo‘lgan.

Skopening o‘n bir joyida, shuningdek Veles, Shtip, Strumitsa va Valandovo shaharlarida tintuv o‘tkazilgan. Shundan so‘ng, 26 yoshdan 56 yoshgacha bo‘lgan olti nafar fuqaro hibsga olingan.

Mamlakat politsiyasi tekshiruvlar chog‘ida pul, mobil telefonlar, SIM-kartalar, yarim kilogramm giyohvand modda va boshqa shu kabi noqonuniy ashyolarni musodara qilgan.

Noqonuniy muhojirlar mamlakatga Gretsiya chegaralaridan olib o‘tilayotgani ma’lum bo‘ldi.